O PSdeG creará un grupo de expertos para buscar solucións á "crise sanitaria"
Formoso critica que Rueda cualifique como puntual a situación
O secretario xeral do PSdeG, Valentín González Formoso, vai reunir un grupo de expertos para que analicen a situación da sanidade pública en Galicia e acheguen solucións. Despois publicarán as conclusións e tamén llas trasladarán á Xunta.
Antes dun acto na Coruña, González Formoso censurou as últimas declaracións do presidente da Xunta, Alfonso Rueda, sobre a sanidade galega.
"Definir como puntual a crise sanitaria que está a vivir o noso país é non escoitar aos profesionais. Todos sabemos que hai xente esperando desde hai oito ou doce meses por unha proba", detallou.
O líder do PSdeG aclarou que ante esta situación, o seu partido poñerá mañá a funcionar a varios expertos que analicen a situación e valoren como se pode dar resposta ás necesidades.
"Non só poñemos deberes senón tamén achegamos solucións, mañá mesmo imos poñer en marcha un grupo de expertos que vai poñer encima da mesa medidas concretas que ofertaremos ao Goberno galego no ámbito parlamentario como conclusión do noso traballo", explicou.
