O Goberno concédelle o indulto parcial á expresidenta do Parlament Laura Borràs

O Consello de Ministros acordou conceder o indulto parcial á expresidenta do Parlament de Catalunya Laura Borràs. Conmutaráselle a pena de prisión de 4 anos, 6 meses e 1 día que se lle impuxo polos delitos de prevaricación e falsidade documental por outra de dous anos.

Segundo informou este martes o Ministerio de Xustiza, o resto da pena que lle foi imposta por estes delitos cometidos cando dirixía a Institució de les Lletres Catalanes (multa e inhabilitación de 13 anos) mantense.

A través dun comunicado, Xustiza sinala que o indulto a Borrás, un dos cinco aprobados polo Goberno, concédese nos termos expostos polo propio Tribunal Superior de Xustiza de Cataluña, que foi o que a condenou e na sentenza afirmou que a pena de prisión resultaba desproporcionada e excesiva.

O Tribunal Superior de Xustiza de Cataluña (TSXC) condenou a Borrás en marzo de 2023 por adxudicar contratos a dedo na Institució de les Lletres Catalanes, pero propuxo o seu indulto parcial para que puidese evitar a prisión.

Indultado o xestor cultural Natalio Groso

Outro dos indultos concedidos este martes é o que beneficia ao artista e xestor cultural Natalio Groso, condenado a 8 anos de prisión, 8 de inhabilitación e unha multa por delitos continuados de malversación de fondos públicos e falsidade documental e societaria durante a súa xestión a cargo do Centro Niemeyer de Avilés.

O Goberno acordou indultar a Groso a pena privativa de liberdade pendente de cumprimento e manter o resto por motivos humanitarios relacionadas co seu estado de saúde e despois de que o solicitasen numerosos artistas e persoas do sector audiovisual.

O exdirector do Niemeyer ingresou en prisión en decembro do pasado ano despois de ser detido en Portugal tras permanecer máis de dous anos fuxido da xustiza.

Rebaixada de tres a dous anos a pena do exalcalde de Linares (Xaén)

O Executivo tamén acordou indultar de forma parcial o exalcalde socialista de Linares (Xaén) Juan Fernández Gutiérrez, unha decisión coa que se conmuta a pena de prisión de tres anos imposta por outra de dous anos, aínda que se mantén a pena de inhabilitación de sete anos.

Fernández Gutiérrez foi condenado pola Audiencia de Xaén en novembro de 2011 como autor dun delito de malversación de fondos públicos por cobrar sobresoldos por un valor de 125.377 euros procedentes das contas do grupo municipal socialista ao que pertencía.

A solicitude de Fernández, que foi alcalde de Linares desde 1999 ata 2017 e ademais portavoz do grupo socialista desde 2011, cando cobrou as devanditas cantidades, contaba co informe favorable do tribunal sentenciador, o aval do Grupo Popular e do Grupo Socialista de Linares, o apoio do Concello desta localidade e o dunha asociación veciñal que solicitou unha cifra relevante de firmas ao seu favor no municipio.

Para rematar, o Consello de Ministros aprobou indultar parcialmente dúas persoas máis (cidadáns particulares, non públicos) condenadas por delitos contra a saúde pública ás que se lles conmutarán as penas de 3 e 4 anos e medio de prisión por unha de dous anos. Ambas as dúas contaban con informes favorables dos tribunais sentenciadores e do ministerio fiscal.