O PSdeG reivindica o papel da emigración na celebración do Día de Galicia
Como xa á tradicional, os socialistas deixaron flores ante o busto de Castelao en Rianxo
Gómez Besteiro reivindicou, desde Bos Aires, o papel da diáspora como gardadores da nosa cultura e da nosa memoria
O PSdeG uniu a Galicia coa súa diáspora no acto que cada 25X celebra en Rianxo, vila natal do intelectual Alfonso Daniel Rodríguez Castelao que en Bos Aires pronunciou o discurso 'Albela de Gloria' e desde ese lugar o líder dos socialistas avisou que a emigración non se toca.
José Ramón Gómez Besteiro que conectou por videoconferencia coa ofrenda floral ante o busto do autor, político e debuxante que faleceu no exilio, garantiu que non permitirán retroceso algún nos dereitos dos descendentes da emigración e aos que están no exterior aseguroulles que son parte inseparable.
"Marcharon, pero nunca se foron do todo", apuntou e dixo que o seu partido defenderá con firmeza, a través da lei de Memoria Democrática, os dereitos recoñecidos aos fillos e netos daqueles que partiron "con moi pouco".
Nas súas palabras, o tamén portavoz do Grupo Parlamentario Socialista reivindicou un "novo salto" no autogoberno, con máis competencias, máis recoñecemento político e maior capacidade para decidir.
Un novo Estatuto que blinde dereitos fundamentais e colocar a vivenda como piar, xunto á sanidade, a educación, as pensións e a dependencia.
Fixo votos tamén na parte final Besteiro por un galeguismo "fresco, plural, feminista e aberto" e por unha Galicia orgullosa da súa identidade e capaz de dialogar con España, con Europa e con América.
"Non se lle poden poñer portas ao mar. Tampouco se lle poden poñer fronteiras ao sentimento de pertenza dun pobo que aprendeu a vivir nas dúas beiras do Atlántico", manifestou Besteiro.
