Substitúen os aeroxeradores do parque eólico Monte Redondo, en Vimianzo, por outros máis eficientes
Pasará de ter 66 aeroxeradores a 11, pero manterá a potencia instalada
Naturgy inviste 65 millóns de euros neste proceso
Os traballos de desmantelamento neste parque eólico de Vimianzo comezaron a finais do mes de abril. Aquí, os 66 aeroxeradores actuais vanse substituír por 11 máis modernos, con máis potencia e menor impacto visual.
"A realidade é que aínda que mantemos a potencia, multiplicamos a produción. No mesmo emprazamento e coa mesma potencia xérase máis enerxía limpa porque os equipos son máis eficientes e fan mellor uso do vento", explica María Landeira, delegada de Desenvolvemento de proxectos renovables de Naturgy en Galicia.
A conselleira de Medio Ambiente, Ánxeles Vázquez, visitou esta mañá Monte Redondo e subliñou que con este tipo de parques se reducen as emisións de CO2.
"Producindo máis e mellor evitamos as emisións de CO2 e isto supón que cos nove proxectos que temos enriba da mesa, Galicia deixa de emitir cen mil toneladas de CO2", asegura Ángeles Vázquez, conselleira de Medio Ambiente e Cambio Climático.
Amais de Monte Redondo, Naturgy desenvolve en Galicia outros dous proxectos de repotenciación. Nas Somozas, onde substituirá 81 aeroxeradores por 9, e no parque eólico Novo, nos concellos de Valdoviño, San Sadurniño e Narón, que pasará de 25 a 5 aeroxeradores.
Está previsto que as obras neste parque eólico de Vimianzo estean rematadas en xuño de 2026.
