O Parlamento reclama ao Goberno negociar con Ryanair para que evite "illar" Galicia

O Parlamento galego aprobou, sen votos en contra, unha iniciativa do BNG, emendada polo PPdeG, para reclamar ao Goberno central iniciar negociacións "urxentes" con Ryanair para eliminar o ERE proposto para Santiago de Compostela e manter o seu nivel operativo neste aeroporto como no de Vigo "e así evitar o illamento aéreo da Galicia".

A proposición non de lei aprobada na comisión de Ordenación Territorial, que contou coa abstención dos deputados do PSdeG e o apoio do resto de grupos, tamén demanda "coa mesma finalidade" a intervención "conxunta e urxente" dos ministerios de Transportes e de Traballo e que, en todo caso, "realicen en Santiago e non en Madrid as negociacións do ERE anunciado pola empresa".

O deputado do BNG Paulo Ríos defendeu esta iniciativa que incluía outro punto para instar a impulsar a cooperación entre as diferentes administracións públicas para "articular un sistema aeroportuario galego integral", pero foi rexeitado polos votos en contra do PPdeG.

Na súa intervención, Ríos advertiu de que as administracións públicas deben "xogar o seu papel acorde coas súas capacidades e competencias" polo que corresponde actuar aos concellos (A Coruña, Santiago de Compostela e Vigo), á Xunta e ao Goberno central.

A decisión de Ryanair de reducir a súa actividade en Galicia e o ERE anunciado para o seu persoal no aeroporto de Santiago de Compostela-Rosalía de Castro ten non só unha consecuencia laboral inmediata, senón que afecta a un centenar de traballadores e deixa á comunidade "en risco de illamento aéreo", opinou.

Por iso, considerou que a Xunta debe defender os servizos aeroportuarios ante as "decisións inxustificadas" de Ryanair e non derivar a responsabilidade en Aena, xa que "o problema non son as taxas" que este xestor de tráfico aéreo estatal incrementou e que a aeroliña pon de "desculpa" para a súa "chantaxe" ás administracións.

Pero o deputado do PPdeG Gonzalo Trenor apuntou a un conflito económico entre Ryanair e Aena que "ten como reféns aos galegos" e instou ao Goberno central a "tomarse en serio as súas competencias" e a buscar unha solución, en lugar de derivala á comunidade autónoma e os municipios.

Tamén dixo que os concellos poden "facer algo e falar entre eles" para facilitar a coordinación e a planificación conxunta que necesitan os tres aeroportos galegos que "non están a funcionar como deberían funcionar", admitiu.

Pola súa banda, o deputado do PSdeG Aitor Bouza mostrou o seu "rexeitamento absoluto" ao ERE "inxustificado" anunciado por Ryanair e coincidiu en que cada administración teñen que actuar "dentro das súas competencias", en particular a Xunta, que debe promover unha política aeroportuaria integral para a comunidade autónoma e "deixar de botar balóns fóra" aos municipios e ao Goberno central.