O Papa debe operarse dun nódulo nun pulmón en fase "moi inicial"

León XIV anunciou este domingo que deberá operarse "nos vindeiros días" dun nódulo nun pulmón detectado nunha fase "moi inicial e ben localizado", afirmou tras o rezo do Angelus.

"Recentemente, durante algúns controis, os médicos atopáronme un nódulo circunscrito ao pulmón. Está identificado nunha fase moi inicial e ben localizado", dixo o pontífice desde a fiestra do pazo apostólico.

O Papa explicou que o persoal médico "considera oportuno intervir" polo que, seguindo os seus consellos, decidiu "operarse para extirparlo" e, de feito, a intervención xa está programada "nos vindeiros días".

"Agradézovos a vosa proximidade espiritual e encoméndome á vosa oración. Grazas e bo domingo", díxolles visiblemente tranquilo ás persoas que o escoitaban na praza de San Pedro.

León XIV, o primeiro papa estadounidense da historia, elixido o 8 de maio de 2025, fixo 71 anos o 14 de setembro. Antes de anunciar a súa operación cirúrxica, saudou a Irmandade do Señor dos Milagres en Roma, con gran devoción no Perú.

"Grazas pola vosa oración pola visita pastoral que levarei a cabo no Perú", afirmou. 

Na súa axenda máis próxima está programada unha viaxe apostólica, do 6 ao 17 de novembro, ao Uruguai, á Arxentina e o Perú, país este último do que posúe a nacionalidade polos moitos anos que pasou alí como misioneiro e bispo.

Ingreso postoperatorio

A intervención está programada para a vindeira semana e conlevará un ingreso posoperatorio de sete días, segundo confirmou este domingo a Santa Sé.

"En resposta ás preguntas da prensa, podo precisar que a intervención está prevista para os primeiros días da vindeira semana e que o tempo previsto de hospitalización postoperatoria é de aproximadamente unha semana", indicou nunha breve comunicación o voceiro vaticano, Matteo Bruni.

Os papas teñen ao seu dispor un apartamento no hospital Gemelli de Roma para someterse a este tipo de operacións e ingresos.