O Museo Estrella Galicia abre unha exposición sobre o piloto de Fórmula 1 Carlos Sainz

O Museo de Estrella Galicia, na Coruña, abre unha nova exposición temporal dedicada ao piloto de Fórmula 1 Carlos Sainz, embaixador de Estrella Galicia 0,0 desde os inicios da súa traxectoria.

Segundo informou este xoves a compañía, o museo acolle unha serie de obxectos que poñen en valor o estreito vínculo da marca co deportista do equipo Atlassian Williams F1 Team.

Na mostra o público poderá descubrir desde o coche de karting co que competiu de neno aos cascos das súas carreiras máis importantes de Fórmula 1, ademais de trofeos dos seus grandes éxitos, monos e equipamento real do piloto.

O vínculo entre Estrella Galicia 0,0 e Carlos Sainz remóntase aos inicios do piloto no automobilismo en 2013 e consolidouse ao longo da súa carreira na Fórmula 1.

Esta nova exposición dedicada a Carlos Sainz "é unha mostra do orgullo que sentimos por acompañar a persoas que, como el, representan valores que forman parte do ADN da nosa compañía", afirma o presidente executivo de Corporación Hijos de Rivera, Ignacio Rivera.

"A súa traxectoria reflicte inconformismo, esforzo e unha paixón constante por superarse, principios que tamén guiaron o camiño de Estrella Galicia 0,0 desde as nosas orixes. Esta relación, que comezou nos seus primeiros pasos no automobilismo, simboliza unha historia de crecemento compartido e de confianza mutua ao longo do tempo. Pero é que ademais é unha relación que comezou en certo xeito moito antes, a principios dos anos 70, cando Antonio, avó de Carlos, construíu a nosa fábrica de Agrela. Incorporar ao noso museo pezas tan significativas da súa carreira é un orgullo", engade.

"Cando boto a vista atrás e penso en como empezou todo con Estrella Galicia 0,0, doume conta de que o máis valioso foi crecer xuntos. Non só como piloto e como marca, senón compartindo unha forma moi similar de entender o traballo, a constancia e o respecto polo método para facer as cousas e lograr cada obxectivo", expón Carlos Sainz.

A colección de obxectos deportivos de Carlos Sainz pódese visitar durante o percorrido xeral do museo, con calquera das entradas que dan acceso.