O incendio das cocheiras de Burgos calcina a metade da frota de autobuses urbanos

Preto das dúas da mañá saltou a alerta porque un incendio estaba arrasando as cocheiras en que pasan a noite os 75 autobuses que dan servizo na rede de transporte urbano de Burgos. O combustible dos propios vehículos, a gran maioría de gas natural, propiciou a rápida expansión do lume.

Malia a rápida intervención dos bombeiros, 39 autobuses quedaron calcinados por completo ou moi estragados. Un mecánico e outro compañeiro que estaba na nave lograron poñer a salvo catro unidades, pero un deles tivo que ser hospitalizado por inhalación de fume.

Lapas de ata seis metros de altura

A alcaldesa e o responsable do servizo de extinción avanzaron esta mañá que aínda é pronto para coñecer as causas e deron por feito que a investigación será longa. O que si confirmaron é que o edificio non será reconstruído porque as lapas, que chegaron a ter ata seis metros de altura, fixeron colapsar a cuberta da área de aparcamento e talleres e arrastraron atrás parte dos muros.

A cuberta da nave de aparcamento e taller colapsou por completo

As perdas económicas son moi cuantiosas. Para avanzar unha pauta de estimación, a alcaldesa lembrou que so o último dos autobuses que mercaron valeu 600.000 euros. Tamén adiantou que non vai ser doado facerse con tantos vehículos a un tempo. Por iso pediu a colaboración doutras cidades, para poder ir repoñendo canto antes a metade das liñas do transporte municipal, que tiveron que ser suspendidas.