O Goberno di que "tratará de dar unha solución" aos residuos radiactivos da Foxa Atlántica

O delegado do Goberno en Galicia, Pedro Blanco, destaca que o Executivo central se mantén "en contacto permanente" coa expedición francesa que busca bidóns radioactivos fronte á costa de Galicia, no que valora como unha investigación "oportuna". "Imos tratar de darlles unha solución", asegura sobre estes residuos.

A preguntas da prensa este venres en Santiago, Blanco explicou que se segue a esta expedición para que vaia "informando" dos seus achados, "cantos" bidóns hai e "de que tipo". Tamén se abordará "cal vai ser a solución que poida darse".

Lembra que estes bidóns tiráronse durante décadas no século XX, cando "a conciencia probablemente fose outra, completamente diferente". "Ao Goberno de España claro que lle preocupa", deixou claro.

Así, explica que o Goberno está "pendente" dos resultados dos informes desta investigación, de modo que trasladará os resultados ás comunidades afectadas "con absoluta transparencia, como sempre, e con absoluta preocupación polo medio mariño".

Buque L'Atalante (Flotte Ocánographique Française)

Remarca que os bidóns están "localizados", polo que hai que "ver exactamente cal é o estado no que están, porque iso é fundamental", ademais das súas "consecuencias" para a contaminación.

Pedro Blanco incide en que o Goberno "está preparado, preocupouse e está pendente" destes resultados.

A Xunta denuncia que non ten ningún tipo de información

Despois de que a expedición localizase os primeiros 1.000 bidóns radioactivos, a Xunta, a través da Dirección xeral de Calidade Ambiental, solicitou ao Consello de Seguridade Nuclear, dependente do Goberno, información.

Nunha carta remitida ao secretario xeral do Consello de Seguridade Nuclear, a directora xeral de Calidade Ambiental, María José Echevarría, solicita información a este departamento no marco das funcións da Xunta "en materia de residuos dentro da Comunidade autónoma de Galicia".

A conselleira de Medio Ambiente, Ángeles Vázquez, denuncia que "Galicia non ten ningún tipo de dato" sobre a expedición francesa que busca bidóns radioactivos fronte ás costas galegas.

En declaracións este venres, Vázquez queixouse de que non recibiron "absolutamente nada" por parte do Executivo central. "Nós pedimos, por suposto, tranquilidade, pero tamén pedimos datos", sentenciou.

A conselleira dixo "chamar a atención" que esta procura se faga enfronte da costa galega sen que o Goberno púxose en contacto no Executivo autonómico. "Esta mesma semana estivo (en Vigo) a ministra de Transición Ecolóxica, por suposto non falou en absoluto deste tema", lamenta.

Os partidos piden información á Comisión Euopea

Os eurodiputados do PP reclamaron información á Comisión Europea sobre estes residuos. En concretaron, rexistraron unha pregunta para saber se estaban ao tanto da misión e piden información sobre posibles verteduras. 

Tamén solicitou información a Bruxelas sobre eses residuos a eurodeputada do BNG Ana Miranda, para "lembrarlle que non fixo o seu traballo respecto á investigación dos residuos radioactivos da foxa atlántica", sinalou nun comunicado.

 O eurodeputado socialista Nicolás González Casares remitiu unha carta á Comisión na que cuestiona á Comisión sobre o liderado da misión francesa"dada a localización das verteduras e a natureza transfronteiriza do seu potencial impacto". Así, consultou sobre a posible participación ou seguimento por parte da Comisión dos resultados.   

Greenpeace urxe a UE e Goberno a asumir a investigación de 220.000 bidóns radioactivos

Greenpeace reclama á Unión Europea e ao Goberno español que asuman as investigacións para determinar o estado dos 220.000 bidóns con residuos radioactivos que hai na Foxa Atlántica, a 700 quilómetros das costas galegas.

Por mor dos estudos do Centro Nacional para a Investigación Científica de Francia (CNRS, polas súas siglas en francés) a bordo do buque oceanográfico L'Atalante, que sacou á luz os primeiros 1.000 bidóns radioactivo, "unha parte ínfima destes barrís radioactivos presentes na fosa atlántica", fronte ás costas galegas, Greenpeace reclamou que tanto a Unión Europea como o Goberno español se fagan cargo de determinar "o estado do punto con maior cantidade de residuos radioactivos do planeta".

Entre as décadas dos corenta e os oitenta do século pasado, buques holandeses, belgas e británicos descargaron refugallos radioactivos na fosa atlántica. Non foi ata 1982 cando o buque Sirius de Greenpeace, xunto a barcos galegos, se enfrontaron a buques holandeses para que detivesen as súas descargas. Calcúlase que a industria verteu 142.000 toneladas de lixo nuclear. Á súa volta, 10.000 persoas recibiron ao Sirius no porto de Vigo.

Esta acción foi a primeira acción pacífica de Greenpeace España, aínda que legalmente non estaba establecida como organización nese momento. A acción marcou un fito importante, sendo unha das sementes que orixinou a súa fundación en 1984, explica a organización ecoloxista nun comunicado.

"Tras a acción, cuxas imaxes deron a volta ao mundo, o Goberno holandés anunciou a interrupción das verteduras nucleares ao mar. Dez anos máis tarde, en 1992, asinouse o Convenio para a protección do medio ambiente mariño do Atlántico nordeste, prohibindo o refugallo dos residuos nucleares de baixa e media intensidade. Un ano despois, o Convenio de Londres da Organización Marítima Internacional vetou calquera vertedura radioactiva ao mar", relata.

Agora, remarca que a expedición científica francesa "puxo de manifesto que a radiación segue contaminando o mar". "A renuncia da Unión Europea a investigar a situación actual, o que levou a Francia a realizala pola súa banda, pon de manifesto o perigo do lixo nuclear", resalta.