Catro meses de restricións de auga en Castro por un elevado nivel de arsénico
Nunca antes se dera que en decembro a veciñanza tivese que mercar garrafas para beber ou cociñar
En Castro de Ribeiras de Lea e noutros núcleos de Castro de Rei levan máis de catro meses recorrendo á auga embotellada tanto para beber como para cociñar. O motivo é a presenza de arsénico na captación da principal traída deste concello chairego, segundo Sanidade nun nivel que excede o máximo aconsellable para o seu consumo.
O arsénico procede dunha antiga mina, polo que a veciñanza leva toda a vida afeita ás restricións de auga. Así e todo, nunca antes se dera que en decembro non se puidese consumir a da traída. Ante esta situación, os residentes nas parroquias afectadas demandan unha solución definitiva para que a auga que chegue aos seus fogares estea libre de arsénico.
A reforma da estación de tratamento de auga potable tería un custo duns tres millóns de euros, polo que administración local dependerá da autonómica para poder executar o proxecto.
.png)
