Un incendio calcina unha casa en Cervantes e os seus habitantes son evacuados
Os tres membros da familia que vivían na vivenda foron evacuados sen danos persoais
O lume calcinou a cuberta e boa parte da vivenda
Un incendio calcinou por completo unha casa en San Miguel de Vilarello, en Cervantes. Os tres membros da familia que vivían na vivenda, un matrimonio ancián e un do seus fillos, foron evacuados sen danos persoais. O lume calcinou a cuberta e boa parte da vivenda.
O alcalde de Cervantes, BenignoGómez, que é veciño da mesma parroquia, desprazouse ata o lugar para comprobar os danos e falar coa familia que se realoxou noutra casa máis vella ao carón da queimada. Todo apunta a que o lume se orixinou ao prender a cheminea e se propagou polo material illante do faiado.
No dispositivo participaron os bombeiros, os axentes forestais, a Garda Civil, Protección Civil e mesmo os veciños colaboraron na extinción do lume. Un retén de bombeiros quedou na zona para arrefriar os restos e evitar que as lapas se reavivasen.
