Extinguido o incendio de Visma, na Coruña, que queimou 5 hectáreas de monte baixo
A intensa fumareda fixo que o concello desaloxara unha trintena de persoas por precaución
O lume obrigou a mobilizar un amplo dispositivo de emerxencias
Quedou extinguido contra as nove da noite o incendio declarado na tarde deste domingo na parroquia de Visma, na Coruña, que mobilizou durante horas os servizos de emerxencia da cidade. As primeiras hipóteses apuntan a que o lume puido comezar nuns valados de plástico nas inmediacións de Talleres Hércules, preto do parque de Bens.
Desaloxada unha trintena de veciños por mor do fume
O incendio declarouse contra as seis e vinte da tarde e calcinou unhas cinco hectáreas de monte baixo. A intensa fumareda obrigou a tomar medidas preventivas na contorna e desaloxar unha trintena de veciños.
O forte vento dificultou moito os labores de extinción. Os bombeiros da Coruña mobilizaron tres vehículos autobomba, aos que se suman os medios da Consellería do Medio Rural: seis axentes, cinco brigadas, cinco motobombas e dous helicópteros. O incendio quedou extinguido contra as nove da noite deste domingo.
A Consellería do Medio Rural lembra que está a disposición da cidadanía o número de teléfono gratuíto 085 e a aplicación móbil ALume para avisar en caso de incendio forestal, así como outro teléfono (900 815 085) para denunciar calquera actividade delituosa incendiaria da que se teña coñecemento ou sospeita.
