A UME mobilízase de urxencia tras activarse a alerta vermella por inundacións en Valencia

Mobilizada a Unidade Militar de Emerxencias (UME) ante o aviso vermello por inundacións en Valencia, que está deixando arredor de 300 litros de chuvia por metro cadrado en 24 horas. Trátase do episodio de choiva máis importante na zona desde novembro de 1987.

A delegada do Goberno asegura que media docena de municipios da zona costeira están incomunicados por mor da chuvia, desde osur de Gandía ata o municipio de Oliva, onde foi preciso desaloxar unhas 2.000 persoas que se atopaban en sete campings da localidade.

A alcaldesa Yolanda Pastor, recoñece que a situación é "moi complicada", e explica que a zona baixa da localidade, en dirección á praia, atópase alagada e que se están realizando rescates.

A Generalitat activou o nivel 2 de emerxencia  e enviou un É-Alert pedíndolle á poboación das zonas afectadas que eviten os desprazamentos ante o risco de inundacións por desbordamentos e acumulación de auga.

A delegada do Goberno na Comunitat Valenciana, Pilar Bernané, asegura  que actualmente o perigo é "extraordinario" nos ríos e barrancos da Safor e a Mariña, e que se están producindo "múltiples rescates".

De momento, a Generalitat solicitou que se mobilice o helicóptero do Consorcio Provincial de Bombeiros de Valencias. para realizar este tipo de intervencións.

"Non vos despracedes, subide ás partes altas e seguide todas as recomendacións de Emerxencias" da Generalitat, alerta Bernabé nas súas redes sociais.

Poucos incidentes durante a noite en Mallorca, Eivissa e Formentera

En Mallorca, Eivissa e Formentera, mentres, rexistráronse só 16 incidentes polo temporal de choiva e vento durante a noite deste domingo. A Axencia Estatal de Meteoroloxía (Aemet) rebaixou a alerta de vermella a laranxa ante o aviso de que se acumulen ata 50 litros de chuvia por metro cadrado nunha hora.

A maioría de incidentes producíronse na illa de Eivissa, con tres inundacións de establecementos, catro caídas de árbores, o corte dunha estrada, unha vertedura nun inmoble, unha intervención por risco de inundación nun comercio e o peche do porto.

Se se contabilizan todos os incidentes relacionados co temporal desde a noite do sábado ata primeira hora da mañá do luns, concentrados principalmente en Eivissa e Formentera, suman 113, indicaron as mesmas fontes.

O Govern balear ordenou para a xornada deste luns a suspensión de todas as actividades lectivas nos centros de ensino de Mallorca e as Pitiusas.