O Goberno de Portugal anuncia unha nova baixada de impostos para paliar os efectos da guerra

O primeiro ministro de Portugal, Luís Montenegro, anunciou este xoves unha batería de medidas para facer fronte ao aumento do custo de vida derivado da guerra en Oriente Medio, entre elas unha redución de impostos e axudas ao transporte.

"Non temos influencia algunha sobre a orixe desta crise, pero sentimos, e moito, o seu impacto. E somos conscientes de que este impacto pode prolongarse e mesmo agravarse xa a próxima semana", dixo Montenegro para informar das medidas adoptadas este xoves no Consello de Ministros.

O primeiro ministro referiuse a que son "tempos difíciles" e dixo que comparte as "angustias" dos portugueses e que o Executivo tamén está preocupado por "a incerteza que chega desde o estranxeiro".

As medidas aprobadas polo Goberno son: un complemento extraordinario para os pensionistas, de entre 200 e 100 euros, que xa anunciara Montenegro a semana pasada, e unha nova baixada no imposto sobre a renda (a quinta deste Executivo), concretamente ata o sexto tramo, que baixarán entre 0,3 e 0,5 puntos, e que está "dirixida especialmente aos fogares de clase media".

Esta rebaixa fiscal, segundo Montenegro, terá un impacto de 400 millóns de euros.

Tamén se aprobou unha axuda nos transportes a través dunha ampliación do abono ferroviario verde aos servizos urbanos de Lisboa e Porto.

"Por só 20 euros ao mes pódese viaxar en todas, absolutamente todas as liñas ferroviarias do país, coa excepción do Alfa Pendular", detallou Montenegro.

Para rematar, anunciou unha nova axuda para os sectores máis expostos ao aumento dos prezos dos combustibles, como o son o sector do transporte de mercancías e de pasaxeiros, os taxis, as institucións privadas de solidariedade social e as asociacións humanitarias de bombeiros.

"Polo ben de todos, debemos equilibrar a sensibilidade social coa responsabilidade financeira, o voluntarismo excesivo ou as solucións doados no presente supoñen problemas no futuro. Non conten comigo, nin co Goberno, para alimentar ilusións hoxe que se convertan nun alto prezo que pagar mañá", aseverou Montenegro.

O Goberno portugués rexeitou recorrer a unha redución do IVE para conter o aumento dos prezos, nun contexto de encarecemento internacional do petróleo que está a elevar o custo dos combustibles e aumentando a presión sobre os consumidores.

A Axencia Internacional da Enerxía (AIE) indicou no seu informe de setembro que os futuros do cru Brent, de referencia en Europa, cotizaban ao redor dos 105 dólares por barril, 21 dólares máis que a comezos de agosto e un 45% por encima do nivel anterior ao conflito.

A subida do cru transmítese aos prezos da gasolina e o gasóleo e eleva tamén os custos de produción e transporte das empresas, con efectos indirectos sobre os alimentos e outros bens de consumo.

En Portugal, a inflación interanual situouse en agosto no 3,3%, segundo o último dato do Instituto Nacional de Estatística (INE).