O Goberno portugués inicia un diálogo cos partidos para buscar solucións á crise da vivenda

 O primeiro ministro de Portugal, o conservador Luís Montenegro, anunciou que se reunirá este xoves cos partidos da oposición para tratar de buscar solucións á crise da vivenda a través do diálogo político, e pediu aos portugueses "tempo" para que as políticas do seu Goberno dean resultados.

"Por parte do Goberno, correspóndenos escoitar e decidir", asegurou Montenegro nun discurso dirixido ao país desde a súa residencia oficial en Lisboa, no que tamén repasou algunhas das medidas que o seu Executivo adoptou para tratar de atallar a crise habitacional.

"É certo —continuou— que temos un problema grave en materia de vivenda e tamén é certo, e hai que dicilo con claridade, que non se constrúen casas da noite para a mañá. E precisamente por iso debemos ter a valentía de dicirlles aos portugueses que necesitamos tempo para que as políticas dean os resultados desexados".

Montenegro dixo, ademais, que "o diálogo político sobre a vivenda non é novo, pero agora materialízase" a raíz da lei que o Goberno busca impulsar no Parlamento para modificar o réxime de alugueiro. Precisamente, esta foi unha das principais demandas das protestas: que non se aprobe a iniciativa.

O primeiro ministro afirmou que están "abertos ao diálogo e ás achegas de todos" e que "hoxe hai moitas propostas que se están presentando, procedentes de diversos sectores dos partidos políticos, de organizacións, asociacións, expertos e cidadáns interesados nesta materia".

"Estas propostas deben sistematizarse e sopesarse de forma coherente, organizada e integrada. Non lle facemos ningún favor ao país nin ao futuro se nos sumamos agora a unha poxa de propostas que, no calor do momento, acabará provocando máis estragos ca beneficios", considerou.

Sobre as protestas, dixo: "Somos un país pacífico, somos un país onde todos poden exercer e ver respectados os seus dereitos, en primeiro lugar o dereito de reunión, de manifestación e de libre expresión, pero tamén o dereito á libre circulación, á tranquilidade, á orde e á seguridade, á salubridade e á preservación do espazo público, e o dereito ao exercicio da autoridade por parte das forzas e dos axentes habilitados para iso pola lei e a Constitución".

"Díxeno e repítoo: en Portugal non hai motivo para importar modelos de protesta violentos e hai que facer todo o posible para evitar calquera enfrontamento indesexable", afirmou, nunha referencia velada ás protestas de países como Francia ou Italia.

A protesta converteuse nun foco de tensión política e social en Portugal despois de sucesivas intervencións policiais para desaloxar as acampadas de Lisboa e Porto, que provocaron decenas de detencións e numerosos feridos.

O pasado domingo, máis de 2.000 persoas manifestáronse en Lisboa e arredor dun milleiro en Porto contra as cargas policiais da madrugada anterior, que deixaron trece detidos en ambas as cidades.

As imaxes daquelas actuacións levaron o presidente de Portugal, António José Seguro, a pedir explicacións ao Goberno, mentres que o ministro do Interior, Luís Neves, defendeu a intervención policial.

Seguro tamén presidiu este luns un Consello de Estado para abordar a "cohesión social", despois de recibir individualmente os partidos políticos para debater este mesmo asunto tras as protestas das últimas semanas.