Detido un home en Portugal por violar unha peregrina no Camiño de Santiago
Os feitos aconteceron en Vila do Conde no mes de agosto
A vítima é unha cidadá estranxeira de 39 anos
O presunto agresor, de 59, atopábase en liberdade condicionada tras cumprir unha pena de prisión de 21 anos
Imaxe de arquivo
A Policía de Portugal detivo o sospeitoso de violar e roubar unha cidadá estranxeira, peregrina do Camiño de Santiago, na localidade de Vila do Conde, no norte do país, no mes de agosto.
Nun comunicado difundido este domingo, a Policía detallou que a vítima é unha cidadá estranxeira de 39 anos, á que o autor abordou durante o percorrido e á que someteu a actos sexuais graves mediante o uso de violencia física, alén de desposuíla dos bens que levaba consigo.
O acusado "actuou por sorpresa, aproveitándose das vulnerabilidades da agraviada, do seu coñecemento da zona e mostrando un comportamento compulsivo motivado pola súa satisfacción sexual", agregaron as autoridades.
O detido é un home de 59 anos que conta "cun amplo historial delituoso, incluídos delitos reiterados contra a liberdade sexual".
No momento dos feitos atopábase en liberdade condicionada tras cumprir unha pena de prisión efectiva de 21 anos.
Agora será posto ao dispor das autoridades xudiciais competentes para someterse a un primeiro interrogatorio xudicial no Centro de Investigación Criminal (TIC) de Matosinhos e para que se lle impoñan medidas cautelares.
