O Esplugues quítalle o ascenso ao Vilalba cun gol a 13" do final (4-2)

Non puido ser. O Vilalba FS quedou a un paso do segundo ascenso consecutivo, e de militar por primeira vez entre os grandes do fútbol sala feminino. O equipo galego caeu na eliminatoria decisiva despois de gañar 5-3 na ida, e caer por 4-2 en Esplugues, igualada que lles servía ás catalás, mellor clasificadas na Liga regular.

O Penya Esplugues, un conxunto que exhibiu a súa superioridade durante toda a Liga Regular, pero que caeu en Vilalba, lanzouse á busca dos dous goles que precisaba desde o comezo. Pero o equipo galego xogaba coa tranquilidade que lle daba a súa vantaxe, e pechou a súa portería durante ese treito inicial, cunha Alba moi segura baixo paus. Aos cinco minutos, Coral dispuña dun man a man que rematou fóra, nun aviso claro das locais. Volveu responder Alba ao seguinte disparo das catalás e, na primeira clara das galegas, estas abrían a conta. Foi cun remate co calcaño de Noelia Pires, de costas ante a porteira. Un gol que aumentaba a tres a renda na eliminatoria. 

Aumentaba a esixencia para o Penya Esplugues, pero Alba seguía moi metida no partido para evitar a igualada e desesperar ás locais. Especialmente a Irina, que non axustaba o punto de mira e remataba moi desviado. Por parte das vilalbesas, Noe Pires seguía sendo a xogadora máis perigosa. Pero a máis clara tívoa Elvira, que bateu na cara da porteira Clara nun man a man. 

Nos últimos minutos da primeira metade rachou o partido, e comezaron a sucederse as situacións de perigo. A tres minutos do descanso, un erro na saída de Marta aproveitouno Laia para igualar a un tanto. O Vilalba mantiña ao descanso a vantaxe de dous goles que metera na maleta unha semana antes na ida. 

A segunda metade comezou coa mesma decoración. O Penya Esplugues seguía buscando o gol, e o Vilalba defendendo con solvencia. Aos 4 minutos, Celia Cata marcaba o dous a un que deixaba a eliminatoria máis pechada ca nunca. O tanto espoleou ás locais, e Irina estivo a piques de marcar o terceiro nese treito do encontro. Cando xa parecía que remitía este acoso local, Clara volveu tirar proveito dun erro na saída de Vilalba e anotou o terceiro. Gol que igualaba a eliminatoria, pero que lle daba vantaxe ao Esplugues no caso dun empate final. Así que lle tocaba a Vilalba botar o partido ás costas e buscar o 3-2. Marta Hermo tivo unha boa ocasión, pero respondeu Clara. E Alba fixo tamén unha gran parada para asegurar o tempo suplementario. 

Na segunda metade da prórroga, nos tres minutos decisivos, Pasto entrou como quinta xogadora á busca da superioridade e do gol salvador. E este chegou a dous da conclusión, por medio de Paula Rodríguez. 

O Vilalba tocaba o ascenso coas mans, pero aínda lles quedou tempo ás locais para atacar con porteira xogadora. Tiveron unha clara que salvou Alba cun paradón. E, a 13 segundos do remate, Pilar marcou o 4-2 definitivo, que deixaba ao Vilalba á beira do ascenso. O Penya Esplugues xogará na primeira división.