Vitoria traballada do Celta para seguir sumando en Europa na noite de Iago Aspas

Comezou o Celta cun golazo temperán do seu capitán, no que era o seu partido número 534. Iago Aspas estreaba o marcador no primeiro minuto, dando comezo a unha noite de festexos en Vigo.

No 14 empataban o partido os franceses por medio de Cho, nun momento no que o Niza xogou mellor e tivo oportunidade de marcar o segundo. Un Celta irregular marchaba ao descanso con superioridade numérica logo da expulsión de Clauss por dobre cartón amarelo.

Xa na segunda metade, os de Claudio Giráldez saíron claramente a dominar o partido coa saída de Hugo Álvarez e a entrada de Borja Iglesias. Logo de media hora de asedio do Celta, con todos os xogadores do Niza pechados no seu campo, chegou o segundo dos celestes. Recibiu Borja Iglesias na área un balón filtrado por Mingueza e marcaba para desempatar con algo de axuda do defensa rival, ao que lle bateu o balón antes de entrar na portería. Nos últimos minutos, intentou o Niza empatar, tivo varias oportunidades desde a esquina, pero sen resultados. 

Bryan Zaragoza segue sen marcar, pero foi un dos mellores xogadores do Celta, sendo desequilibrante pola súa banda e Radu de novo decisivo na vitoria do Celta coas súas paradas. 

Ao remate do partido, un espectáculo de drons homenaxeaba a Iago Aspas, o que xa é o xogador que máis veces vestiu a camiseta do Celta, en 534 ocasións.