O cróquet, un aliado contra a esclerose múltiple
Un deporte de baixa intensidade que favorece o equilibrio, a forza e a concentración
O aeroclub de Santiago organiza a actividade cos membros da ACEM
Neste campo líbranse dúas batallas, a de ser o primeiro en pasar as bólas polo arcos e a de loitar contra os efectos físicos e neuronais da esclerose múltiple. Fernando Ramos, delegado de Cróquet do Aeroclub de Santiago, explica que se trata dun deporte ideal "pola súa intensidade suave e porque estimula a coordinación é o cerebro, que é o que precisamos os que temos a enfermidade".
O peso lixeiro do mazo ou o movemento pendular do 'swing' failles traballar o equlibrio, a forza e a concentración que lles vai quitando a enfermidade. Pero sobre todo levántalles o ánimo e iso, segundo din, é o que máis engancha.
"O contorno é espectacular, tes que traballar o equilibrio a puntería, a paciencia, a estratexia para desprazar a bola do contrario, é moi divertido", di Tomás Díaz, membro da Asociación Compostelá de Esclerose Múltiple.
Un convenio de colaboración entre a Asociación de Esclerose de Compostela e o Aeroclub de Santiago fai posible esta iniciativa nun dos sete campos de cróquet que temos en Galicia.
