O Celta, á busca da primeira vitoria mañá en Elxe (16:15h)

O Celta concéntrase no terceiro enfrontamento da semana. Tras visitar ó Raio e o Stuttgart, na estrea europea, mañá terceira saída. Xoga en Elxe. A esixencia dos últimos sete días, con tres partidos lonxe de Balaídos, súmase a necesidade de acadar a primeira vitoria do curso.

O equipo de CLaudio Giráldez acumula cinco empates consecutivos na Liga, todos eles por un idéntico resultado de 1-1, despois da derrota na xornada inaugural contra o Xetafe aló polo mes de agosto.

En Europa, o cadro vigués ven de apañar unha dura derrota en Stuttgart, non tanto polo resultado (2-1), como polas sensacións, sendo superado en gran parte do partido polo equipo alemán. Sen tempo para deixar atrás este partido, xa que os galegos volvían no mediodía de onte a Vigo para adestrarse xusto a seguir, hoxe viaxan a Elxe, con so dúas sesións para preparar o encontro. Esta situación foi denunciada por Borja Iglesias, xa que existe a norma de que os equipos gocen como mínimo dun descanso de 72 horas entre partidos. Non vai ser o caso para os vigueses, que disputan o encontro do Martínez Valero mañá, a partir das 16:15h.

Claudio Giráldez sabe da urxencia de acadar a primeira vitoria, pero pide prudencia. "Todos queremos gañar. Entendo que estou sometido e xulgado polos resultados, pero temos que facer unha análise máis profunda. Houbo partidos nos que estivemos máis preto, e outros, como o último, en que non xogamos ben".

Sobre o partido de mañá, Claudio agarda "Temos que ser conscientes da dificultade que ten gañar un patido nesta categoría. Xogamos contra un equipo moi difícil, que aínda non perdeu ningún partido. Temos que estar ben", concluiu.