O BOE publica o calendario laboral de 2026, con nove festivos comúns para toda España

O calendario laboral de 2026 recolle un total de 9 festivos que se celebrarán de forma conxunta en toda España, o mesmo número que este ano, segundo unha resolución da Dirección Xeral de Traballo publicada este martes no Boletín Oficial do Estado.

En concreto, en 2026 serán festa en toda España o xoves 1 de xaneiro (Aninovo), o martes 6 de xaneiro (Epifanía do Señor), o venres 3 de abril (Venres Santo), o venres 1 de Maio (Festa do Traballo), o sábado 15 de agosto (Asunción da Virxe), o luns 12 de outubro (Festa Nacional de España), o domingo 1 de novembro (Festa de Todos os Santos), o martes 8 de decembro (Día da Inmaculada Concepción) e o venres 25 de decembro (Natividade do Señor).

Existen outros festivos comúns que as comunidades autónomas poden desprazar a outro día. Así ocorreu co xoves 2 de abril (Xoves Santo), que será festivo en toda España menos en Cataluña e Comunidade Valencia, pero non co martes 6 de xaneiro, o Día de Reis, que todas as comunidades decidiron manter.

Entre as facultades recoñecidas ás comunidades autónomas atópase tamén a posibilidade de substituír o descanso do luns seguinte ás festas nacionais que coinciden en domingo pola incorporación doutras que lles sexan tradicionais, así como a opción de celebrar San Xosé (19 de marzo) ou Santiago Apóstolo (25 de xullo) no seu correspondente territorio.

Desta forma, o 2 de novembro (día seguinte a Todos os Santos) será festivo en Andalucía, Aragón, Asturias, Canarias, Castela-A Mancha, Castela e León, Estremadura, Comunidade de Madrid e Navarra. Así mesmo, o 7 de decembro (día seguinte á Constitución) será festivo en Andalucía, Aragón, Asturias, Cantabria, Castela e León, Estremadura, Comunidade de Madrid, Rexión de Murcia, A Rioxa e Melilla.

Ademais, Baleares trasladará ao luns 2 de marzo o seu festivo autonómico (Día das Illas Baleares). O 2026 contará cun total de 14 días festivos, dos que dous serán locais, fixados por cada concello. As doce festividades restantes son de ámbito nacional e autonómico, que suman nove días que se celebran en todo o país.

Un ano con varias fins de semana longas

En concreto, os traballadores poderán gozar de polo menos catro fins de semana longas en todas as comunidades: o venres 3 de abril (Venres Santo); o venres 1 de maio (Festa do Traballo); o luns 12 de outubro (Festa Nacional de España) e o venres 25 de decembro (Natividade do Señor).

Nas comunidades que optaron por celebrar o Xoves Santo (2 de abril), que son case todas salvo Cataluña e Comunidade Valenciana, haberá unha ponte de catro días, e en sete comunidades (Baleares, Castela-A Mancha, Cataluña, Navarra, País Vasco, A Rioxa e Comunidade Valenciana) esta ponte será de cinco días, debido a que decidiron dar tamén como festivo o luns de Pascua (6 de abril).

Ademais, aqueles traballadores que poidan permitirse coller algún día libre, poderían alongar a fin de semana pola celebración da Epifanía do Señor (6 de xaneiro), que cae en martes.

A Xunta publica o calendario laboral para 2026 e fixa como festivos propios o 19 de marzo, o 24 de xuño e o 25 de xullo

A normativa estatal, fixada polo Real Decreto 2001/1983, establece as 14 festas anuais de ámbito nacional non recuperables, remuneradas e de carácter obrigatorio. Destes 14 festivos, dous son elixidos por cada concello. Dos outros 12 restantes, nove son de carácter obrigatorio e non substituíbles a non ser que coincidan en domingo: 1 de xaneiro, Venres Santo (3 de abril en 2026), 1 de maio, 15 de agosto, 12 de outubro, 1 de novembro, 6 de decembro, 8 de decembro e 25 de decembro.

No ano 2026 hai dous festivos nacionais de carácter obrigatorio que coinciden en domingo: o 1 de novembro (Festa de Todos os Santos) e o 6 de decembro (Día da Constitución) que Galicia propón substituír polo 19 de marzo (San Xosé) e o 24 de xuño (San Xoán), tendo en conta que o 17 de maio (Día das Letras Galegas) cae en domingo en 2026.

Os outros tres festivos de carácter nacional son opcionais, é dicir, poden ser substituídos polas comunidades autónomas: o 6 de xaneiro, que en Galicia nunca se cambia, agás que coincida en domingo; o Xoves Santo (que en 2026 celebrarase o 2 de abril), que na Comunidade galega non se modifica de maneira tradicional; e dáselle a opción ás comunidades de escoller como opcional entre o 19 de marzo e o 25 de xullo.

A Xunta sempre elixe o 25 de xullo, xa que é o Día Nacional de Galicia, tal e como quedou establecido polo Decreto 8/1978, do 10 de xullo . Por tanto, as festas do calendario laboral para Galicia no 2026 que se determinan son: Aninovo (1 de xaneiro), Epifanía do Señor (Día de Reis - 6 de xaneiro), Día de San Xosé (19 de marzo), Xoves Santo (2 de abril), Venres Santo (3 de abril), Festa do Traballo (1 de maio), Día de San Xoan (24 de xuño), Día Nacional de Galicia (25 de xullo), Asunción da Virxe (15 de agosto), Festa Nacional de España (12 de outubro), Inmaculada Concepción (8 de decembro) e Natividade do Señor (25 de decembro). Ademais destes días, cada concello determina dúas xornadas festivas como propias da súa localidade.