Publicador de contidos

Publicador de contidos

O BCE desbota o contaxio no sector financeiro europeo

O BCE desbota o contaxio no sector financeiro europeo

Reuniuse de urxencia para analizar as turbulencias tras as últimas crises bancarias

O Credit Suisse non levanta cabeza, a pesar do rescate do Banco Nacional Suízo

Antón Montero 17/03/2023 19:49 Última actualización 17/03/2023 20:22

Non hai contaxio no sector financeiro da zona euro. É o que opina o Banco Central Europeo, que este venres reuniu de urxencia o seu Consello de Supervisión para analizar as turbulencias nos mercados tras as últimas crises bancarias nos Estados Unidos e en Suíza.

O regulador sostén que as entidades europeas están sas e confía na súa baixa exposición ao Credit Suisse. 

O xigante helvético non dá superado os seus apuros a pesar do crédito de emerxencia que este xoves lle ofreceu o Banco Nacional Suízo. A última mala nova foi a negativa de UBS, o seu principal rival, a participar nunha eventual fusión.

O Credit Suisse, sumido nunha fuga masiva de clientes, perdeu este venres máis dun 8 % na bolsa de Zúric.

Ao outro lado do Atlántico, as augas tampouco baixan calmas. Agora, é o First Republic Bank o que afronta as maiores dificultades: a inxección de 30.000 millóns de dólares por parte dun grupo de grandes bancos non xerou a confianza esperada e as súas accións están caendo preto dun 20 %.

A orixe desta semana negra, o Silicon Valley Bank, declarouse este venres oficialmente en creba nun tribunal de Nova York. Ten 2.000 millóns de dólares de liquidez e máis de 3.300 de débeda.

O presidente dos Estados Unidos, Joe Biden, pediulle ao Congreso que endureza as sancións contra os executivos bancarios que fagan mal o seu traballo. Propón que as autoridades recuperen a paga dos banqueiros en caso de creba e que non poidan volver traballar no sector. 

Publicidade
Publicidade
Publicidade
Publicidade