O Barcelona non lle dá opción ao Liceo na final da OK Liga (6-0)
Triunfo claro do conxunto catalán que queda a unha vitoria de erguer o título
O Liceo terá que gañar os vindeiros tres partidos para para gañar a OK Liga. O Barcelona fíxose forte nos dous primeiros da serie final da competición e trae do Palau unha vantaxe clara (2-0). O segundo partido non ofreceu lugar a dúbidas cunha vitoria moi clara por 6-0.
Antes do primeiro minuto Ferrán Font atopou un oco ao carón do casco de Martí Serra para marcar o primeiro do partido. Foi unha saída en tromba do Barça que anotou o segundo no minuto sete grazas a Marc Grau. Antes do descanso Xavi Barroso facía o terceiro.
O encontro quedou visto para sentenza ao pouco de comezar a segunda parte con dous tantos en trinta segundos. Primeiro anotou Alabart nunha falta directa e logo foi Marc Grau o que poñía o segundo na súa conta particular. O ritmo do partido baixou moito nos últimos minutos cos dous conxuntos pensando no terceiro encontro que se xogará na Coruña pero acabou chegando un sexto gol marcado por Llorca.
.png)
