O alto custo do furtivismo: máis de 260 quilos de produto e 600 aparellos ilegais nunha semana

Venres, previo a festivo. Rastrexo da ría palmo a palmo do que se ve e o máis importante do que non está á vista.

"A fin de semana e fóra do descanso semanal é cando vimos comprobar se alguén deixou nasas ou redes sen as boias regulamentarias, para pescar a fin de semana".

"Adoitamos atopar bastantes nasas de polbo caladas de forma ilegal", explican os axentes de Gardacostas.

O fondo da ría de Arousa é un sementeiro de nasas ilegais. Gardacostas localiza máis dun cento nunha soa tarde.

"Agora estamos coa raposa, que leva uns ganchos e vai arando o fondo. Soen deixar aparellos calados sen sinalizar e para iso usamos a raposa", engade Javier López, un dos axentes.

É unha das prácticas máis estendidas da pesca ilegal, un furtivismo que practican os malos profesionais do mar.

"Hai barcos que deixan caladas as redes no mar e atopamos producto que non dan a talla ou están en veda. Iso é prexudicial para os profesionais que si cumpren", denuncia Enrique Rodríguez, xefe de sección de Vixiancia e Control de Gardacostas. 

En fronte do Grove paran un barco que volve do polbo, unha das especies máis castigadas.

Salvo algún exemplar que roza o legal, leva todo en orde. Son os principais beneficiados do cumprimento da norma.

"Eu non levo polbo pequeno, cumpro o talle; iso si, pésoos vivos e había un exemplar que anda nos 9,50 ou 9,60 centímetros, pero é normal polo movemento. Está ben que se controle porque dura máis o polbo e o sector", recoñece o patrón.

Medidas, cotas, pesca fóra de horarios establecidos e marisqueo a pé sen permiso. Horas antes sorprenderan uns furtivos na Pobra. Eses son dos que non se amedrentan, dos que se enfrontan.

"É xente marxinal que se dedica a unha extracción ilegal e que non respectan tamaños nin tampouco cotas porque non están autorizados", engade Enrique Rodríguez.

Menos habitual, pero tamén baixo control está o pirateo na pesca de recreo.

"Controlamos que ten a licenza e as capturas que ten porque hai un máximo permitido", confirma o axente Javier López.

Piratean porque venden e venden porque hai quen lles compra.

"É romper esa cadea, sobre todo, cos establecementos para que non compren ese producto que non van polo canle normal de comercialización", reclama o xefe de sección de Vixiancia e Control de Gardacostas. 

Unha eiva que se conta en cifras: o ano pasado incautáronse preto de 30.000 quilos de marisco e peixe ilegal, que no mercado negro pode supor uns 300.000 euros. 

Dise que cada vez entra menos marisco nas lonxas pero aínda queda moito que se move en capachos.