Amancio Ortega reforza a súa presenza nos EUA coa compra dun rañaceos en Chicago por 490 millóns
É unha torre de 51 plantas, situada no distrito financeiro da cidade e con inquilinos como PwC, o despacho de avogados Barnes & Thornburg, Fitch Ratings e UBS, entre outros
Trátase da venda de oficinas máis importante en Chicago nos últimos anos
Á dereita da imaxe edificio adquirido por Amancio Ortega. Irvine Company
O fundador e primeiro accionista de Inditex, Amancio Ortega, a través do seu brazo investidor Pontegadea, reforzou a súa presenza nos Estados Unidos tras adquirir en Chicago unha torre de oficinas por uns 550 millóns de dólares (490 millóns de euros), segundo informaron fontes coñecedoras da operación a Europa Press.
O complexo de oficinas está situado no número 1 de North Wacker Drive, no distrito financeiro de 'Loop' e pertencía a Irvine Company, a firma do empresario estadounidense Donald Bren, segundo informa 'Custar', que destaca que se trata dunha das maiores transaccións de oficinas realizadas nos EUA en 2026 e a venda de oficinas máis importante en Chicago nos últimos anos.
Inmoble de 51 plantas e co 94% dos seus espazos alugados
Desta forma, o edificio de oficinas, que conta con 51 plantas, ten alugado ao redor do 94% dos seus espazos, contando con inquilinos como PwC, o despacho de avogados Barnes & Thornburg, Fitch Ratings e UBS, entre outros.
O prezo desta adquisición inclúe a asunción dun préstamo hipotecario de 353 millóns de dólares (315,3 millóns de euros) que Irvine contratou en 2021, con vencemento en 2031 e un tipo de interese do 2,71%.
Inditex xa ten en Chicago un edificio de 492 vivendas
Esta adquisición amplía a carteira inmobiliaria do fundador de Inditex en Chicago, onde xa contaba cunha torre residencial de 492 vivendas adquirida en 2023, ademáis do antigo edificio do Esquire Theater, locais comerciais en North Michigan Avenue, así como o hotel Eurostars Magnificent Mile.
Deste xeito, o fundador de Inditex continúa ampliando o seu patrimonio inmobiliario a escala global a través de Pontegadea, acumulando hoteis, naves loxísticas, bloques residenciais e centros comerciais, entre outros activos, distribuídos en países como España, Estados Unidos, Francia, Canadá e Corea.
En 2025 pechou operacións inmobiliarias de máis de 1.655 millóns de euros
Só en 2025 pechou dez operacións inmobiliarias por un valor superior aos 1.655 millóns de euros. Así, Amancio Ortega é propietario da maior inmobiliaria española, orientada á compra e xestión de grandes edificios, cunha carteira de activos composta principalmente por inmobles de oficinas de uso non residencial.
O modelo de negocio de Pontegadea susténtase na adquisición e xestión de edificios non residenciais -fundamentalmente oficinas- situados nos centros das principais cidades do mundo.
