Habilitado un desvío para ambulancias na N-642 entre Cangas de Foz e Burela
A estrada está cortada dende a pasada madrugada tras a aparición dunha focha provocada polas intensas chuvias
Os camións e os coches teñen que desviarse 70 quilómetros mentres o Ministerio de Transportes busca unha solución
Tamén quedou suspendido o tráfico ferroviario entre Burela e Ribadeo, na liña Oviedo-Ferrol
O Ministerio de Transportes, Mobilidade e Axenda Urbana (Mitma) desviou provisionalmente o tráfico da N-642 como resposta ao corte executado esta madrugada entre os puntos quilométricos 41 a 47, desde Cangas (Foz) ata a ligazón do hospital da costa en Burela.
Segundo informa o Mitma, ademais do embalsamamento de auga na marxe esquerda, derivado dos últimos episodios de intensas choivas, apareceron gretas e unha focha no punto quilométrico 42,3, nun dos accesos á localidade de Burela.
O persoal do Grupo de Apoio Loxístico (GALI) da Axencia Galega de Emerxencias colabora no alivio da presión da auga sobre a estrada.
Nun primeiro momento habilitáronse dúas alternativas pero, tras o atoamento dun vehículo pesado, só queda unha de case 70 quilómetros. Só as ambulancias poderán evitar ese desvío, usando un paso específico para o transporte sanitario nas inmediacións da praia de Areoura.
Percorrido alternativo
Desde Cangas de Foz, a ruta recomendada pasa primeiro pola estrada LU-162 ata Ferreira do Valadouro. Despois, o itinerario continúa pola LU-161 e a LU-540 ata Viveiro, para incorporarse novamente á N-642 a través da CG-2.3 en Xove.
A que se establecera nun principio, primeiro pola LU-162 e logo pola LU-P-1502, en sentido Burela, quedou pechada tras o atoamento dun camión.
O Ministerio asegura nun comunicado que xa está a traballar na zona con medios materiais e humanos e analiza as distintas solucións ao problema para que "as afeccións sexan as mínimas posibles".
"O prioritario é a seguridade, de aí o corte da estrada, e hoxe valorar a acumulación de auga que se está a tratar de eliminar e ver ata onde chega o problema para tratar de solucionalo", declarou no lugar Isabel Rodríguez, subdelegada do Goberno en Lugo.
Persoal técnico do Ministerio traballa na zona para buscar solucións
A Xunta reclámalle ao goberno central un plan de conservación das estradas nacionais. A conselleira Ethel Vázquez di que hai un déficit de mantemento nas vías de titularidade estatal da Mariña e noutras como son as autovias A-6, A-52 e na Nacional 542.
Arteria principal
A primeira hora nunha entrevista no Galicia por diante fin de semana da Radio Galega, o alcalde de Burela amosaba a súa preocupación porque a estrada afectada é a que se emprega para ir ao hospital comarcal e tamén circulan por ela moitos camións procedentes do porto.
O rexedor, Alfredo Llano, lembrou que a N-642 é a arteria principal da Mariña, unha comarca que, segundo denunciou, padece dende sempre un déficit de comunicación por estrada.
Corte ferroviario
O estado da calzada e o perigo de desprendemento tamén obrigaron a suspender a circulación ferroviaria entre Burela e Ribadeo, na liña de ancho métrico Oviedo-Ferrol. Segundo informa Adif, estableceuse un plan alternativo por estrada entre Ribadeo e Cerdido.
