Na Rúa continúan os problemas coa subministración de auga tras os incendios do verán

Na Rúa continúan os problemas coa subministración de auga. Tras os devastadores incendios, a comarca de Valdeorras pide axuda para evitar que a cinsa siga entrando nas captacións. Mentres, veciños de distintos núcleos abren a billa e non sae nin gota. 

Múltiples zonas da comarca de Valdeorras levan xa varios días sufrindo problemas coa subministración de auga.
A causa reside nas choivas das últimas xornadas que, nunha das áreas máis afectadas pola vaga de lumes deste verán, arrastraron cinza e restos dos incendios até as captacións de diversos concellos.

Entre eles atópase A Rúa onde, hai xa varios días, a auga da billa comezou a saír de cor marrón en varias zonas.

"Desde que empezou a chover así un pouquiño forte pois, claro, agora vén moi turbia"

"Isto é consecuencia dos incendios, por suposto. Porque, a ver, iso está todo queimado. Entón, agora ao chover arrastra e vén aos depósitos"

Ante esta situación, que imposibilita o consumo da rede pública, especialmente para asearse ou cociñar, dende o concello víronse obrigados a repartir auga embotellada entre a veciñanza.

Con todo, a previsión meteorolóxica non invita ao optimismo. Agoira precipitacións na zona cara finais da vindeira semana, polo que os veciños non ven clara unha solución para o problema a curto prazo.

"Penso que non hai. A solución é que deixe de chover, ou preparar doutra forma os depósitos, non o sei"

"Vou tratar de poñer uns filtros un pouco fortes porque creo que vai ser así todo o inverno. Mentras estea chovendo vai ser así. A solución aí non vai ser moi fácil".