Morren cinco dos 500 migrantes que chegaron ás Canarias na fin de semana

Cinco migrantes perderon a vida na ruta canaria durante a fin de semana cando trataban de alcanzar a costa de El Hierro, a onde chegaron desde o venres un total de 524 persoas en tres caiucos.

Catro das vítimas, de entre 15 e 35 anos, ían a bordo dunha embarcación na que viaxaban 121 persoas. Outras trece tiveron que ser trasladadas a un centro hospitalario.

Tras quedaren sen comida, auga e combustible a 30 quilómetros da illa, foron rescatadas por Salvamento Marítimo o domingo pola mañá.

Segundo o relato dos propios migrantes, levaban oito días de travesía. Partiran de Jinack, en Gambia, e procedían deste país, do Senegal, Malí, Guinea Conakry e Costa de Marfil.

Os tripulantes deste caiuco foron trasladados ao Centro de Atención Temporal de Estranxeiros (CATE), na localidade de San Andrés, no municipio de Valverde, e permanecerán baixo custodia policial, ata que sexan derivados a outros recursos fóra da illa.

Ademais dos catro falecidos desta embarcación, este sábado un veciño da Restinga alertou as autoridades da presenza dun cadáver na baía desta localidade que avistara mentres nadaba nesta zona próxima á costa.

Outra embarcación con 214 persoas

Tras os labores de recuperación do corpo, as autoridades determinaron que se trata do cadáver dun dos ocupantes do caiuco que chegou a El Hierro na madrugada do sábado con 214 persoas a bordo, entre elas 22 mulleres e 5 menores.

Os corpos destas cinco persoas foron trasladados ás instalacións do Instituto de Medicina Legal e Ciencias Forenses na illa, no tanatorio municipal de La Frontera, onde se atopan á espera da autopsia.

A estas dúas embarcacións súmase unha terceira que arribou na noite do venres tras ser localizada a algo máis de sete quilómetros e que foi escoltada a terra coas 189 persoas que ían a bordo, das cales 19 eran mulleres e 4 menores.