Os EUA puideron ser os responsables do bombardeo da escola do que culpaban a Irán
Segundo a Media Lúa Vermella iraniana, unhas 180 persoas, a maioría nenas, faleceron no ataque aínda que tamén hai pais e mestres entre as vítimas
Imaxe do día do funeral polas vítimas. Reuters
Os Estados Unidos foron os responsables do bombardeo a unha escola infantil en Minab, no sur de Irán, onde morreron unhas 180 persoas no primeiro día da guerra, dacordo cos achados preliminares dunha investigación do Pentágono, segundo informou este mércores o diario The New York Times.
O medio, que cita a funcionarios estadounidenses e outras persoas familiarizadas coa investigación, asegura que o ataque do 28 de febreiro contra o edificio do colexio de primaria Shajarah Tayyebeh debeuse a un erro de selección de obxectivo por parte do exército dos Estados Unidos, que atacou unha base iraniana adxacente á escola.
Preguntado por esa información, o presidente estadounidense, Donald Trump, quen ata o de agora acusou a Irán do ataque ao colexio, dixo este mércores á prensa que "non sabe nada respecto diso". Oficiais do Comando Central dos Estados Unidos, segundo detalla The New York Times, crearon as coordenadas do obxectivo para o ataque utilizando datos obsoletos proporcionados por intelixencia.
As fontes mencionadas polo diario insisten en que estes achados son preliminares e que aínda non se sabe por que a información sobre o obxectivo non se verificou dúas veces.
Os Estados Unidos e Israel lanzaron o pasado 28 de febreiro un operativo militar a gran escala contra Irán, no que morreron o líder supremo, Alí Jameneí, parte da súa cúpula militar e outros centos de persoas. O primeiro día de bombardeos foi atacado o colexio, na provincia de Hormozg, nun incidente que Irán cualificou de "acto bárbaro".
Segundo a Media Lúa Vermella Iraniana, unhas 180 persoas, a maioría nenas, morreron no ataque contra o centro escolar, no que tamén faleceron mestres e pais.
Esta semana o mesmo diario levou a cabo unha análise dun vídeo publicado o domingo pola axencia iraniana Mehr onde conclúe que o mísil Tomahawk visible nas imaxes impactou nun edificio descrito como unha clínica médica na base naval iraniana. O exército estadounidense é a única forza involucrada no conflito que utiliza mísiles Tomahawk, lembra The New York Times.
O Pentágono asegurou que está a investigar o ataque á escola, que expertos da ONU e a organización civil Human Rights Watch cualificaron de posible "crime de guerra".
"Como recoñece The New York Times no seu propio informe, a investigación aínda está en curso", dixo a portavoz da Casa Branca, Karoline Leavitt, nun comunicado.
