Moncho Fernández: “A nivel defensivo, estamos ante o mellor Murcia de moitos anos"
O técnico non escondeu a súa satisfacción polo regreso ás pistas do internacional dominicano Rigoberto Mendoza
Moncho Fernández, adestrador do Monbus Obradoiro, afirmou este xoves que o potencial defensivo é a principal característica do UCAM Murcia, ao que reciben mañá no último partido do ano.
“Visítanos un grande equipo, ir quinto a estas alturas da tempada demostra o seu potencial. É un UCAM Murcia recoñecible, a nivel ofensivo mantén a filosofía, a mobilidade e o xogo sen balón. Iso é un aceno de identidade que manteñen. Pero defensivamente creo que estamos ante o mellor Murcia de moitos anos”, subliñou.
O técnico santiagués incidiu en que o equipo dirixido por Sito Alonso está “ao nivel” do Real Madrid en canto ao seu rendemento defensivo porque “xera moitas perdas no rival e concede moi poucas canastras asistidas, o cal é unha mostra do seu potencial no un contra un”.
Por iso, Moncho Fernández considera “moi importante” que os seus xogadores sexan capaces de igualar “ese nivel de esixencia” do conxunto universitario, un equipo “moi agresivo” que traballa “moito” as liñas de pase e “dificulta” os man a man.
O preparador do Obradoiro admitiu que o triunfo no derbi ante o Río Breogán supuxo “un reforzo” anímico para o equipo, e non escondeu a súa satisfacción polo regreso ás pistas do internacional dominicano Rigoberto Mendoza.
“Sabemos o duro que foi este minicalvario de tres meses polo que tivo que pasar, por iso volver cunha actuación tan boa como a súa en Lugo foi unha alegría enorme para todos”, manifestou.
