Milleiros de persoas reclaman na Gudiña as paradas do AVE suprimidas en xuño
A plataforma cidadá Dereito ao tren asegura que a eliminación de frecuencias deixa incomunicada esta zona
Manifestación na Gudiña para reclamar que se restablezan as paradas da liña do AVE que o Ministerio de Transporte suprimiu o pasado 9 de xuño. Din que agora as comarcas do oriente ourensán quedan sen poder viaxar a Madrid.
Unha manifestación, organizada pola plataforma cidadá Dereito ao tren, na que participaron varios milleiros de persoas das zonas afectadas. Aseguran que a supresión de frecuencias os deixa incomunicados.
Na concentración participaron representantes do BNG, do PSdeG e do PP. A plataforma leva recollidas máis de 10.000 sinaturas e a dirección asegura que non será a última acción de protesta. Aseguran que chegarán ata Europa para reclamar un servizo vital para varias comarcas de Ourense.
