Mercar para conxelar antes do Nadal

O mal tempo inflúe de xeito fundamental nos prezos do peixe e do marisco con vistas ao Nadal, porque se os mariñeiros non poden saír ao mar nas próximas semanas veremos como se disparan. Por iso os consumidores adiantan xa as súas compras para evitar esas subas. 

A tres semanas e media da Noiteboa, o mercado ofrece produto da ría variado para ir adiantando as compras sen pagar prezos esaxerados, e iso que algúns mariscos xa foron subindo. 

"Os prezos da centola xa aumentaron. Empezamos en 20 e pico e xa está a 35. O camarón estaba a 55 e xa está a 95 e hai moi pouco. Recordo que o camarón fresco o ano pasado foi a 150 euros, que a min ata me doía a man cobrarlle á xente pero non había. Era precioso, pero é moito carto", asegura Milagros Alca, peixeira. 

Por iso hoxe moitas compradoras botaban contas do espazo que tiñan no conxelador e do que podían aforrar mercando xa.  

"Xa agora paguei polo menos 30 euros máis que hai dúas semanas. Aforrarei 50 ou 60 euros, tranquilamente. E co camarón igual, que sobe a máis de cen. É un capricho dunha vez ao ano, e paso ata por 70 por un quilo. Comprando antes afórrase."

"Vin a robaliza tan fermosa que habitualmente non compro para o Nadal pero collina. Penso que compensa moito, unha robaliza da ría a 29 euros o quilo está estupendamente"

É ademais un xeito de asegurar o menú que se quere sen depender de como veña o tempo ou do que collan eses días os mariñeiros.