Medio Rural acorda cos viticultores do Ribeiro combater os danos da fauna salvaxe
Medio Rural acorda cos viticultores do Ribeiro combater os danos da fauna salvaxe
Nalgunhas parcelas está en risco ata o 40 % da produción de uva
Vanse acometer batidas e deslocalizacións de mandas de corzo e xabaril
O vitivinícola é o principal sector agrario da provincia de Ourense. Catro das cinco denominacións de orixe galegas están nesta provincia. Nunha delas, o Ribeiro, corzos e xabarís están a causar serios problemas aos viticultores. Gromos e acios acabados de nacer son un manxar para os animais, que entran nos viñedos con cada vez maior frecuencia, provocando un importante dano económico.
Para atallar os danos, a Consellería do Medio Rural comprometeuse cos viticultores a realizar batidas nas zonas da súa competencia e a deslocalizar as mandas a medida que a colleita vaia madurando. Unhas medidas que os donos dos viñedos confían en que sexan suficientes para que as perdas económicas non vaian a máis nun momento de auxe desta denominación de orixe.
Os ataques da fauna salvaxe non só causan a perda da colleita senón que mesmo poden provocar a morte das videiras pola intensidade das trabadas.
