Manifestación en Santiago en defensa do sistema sanitario público

Miles de persoas participaron este domingo na manifestación convocada pola plataforma SOS Sanidade Pública en Santiago de Compostela en defensa do sistema sanitario público e en contra dos "recortes" da Xunta de Galicia en materia de saúde.

A marcha partiu pasadas as doce do mediodía da alameda da capital galega e emprendeu un rápido percorrido baixo a choiva polas rúas da cidade, encabezada por unha ampla faixa co lema 'Máis sanidade pública'.

Polo camiño entoaron cánticos e consignas como "Queremos máis atención primaria"ou "Sanidade pública e de calidade"; ademais de portar pancartas con mensaxes reivindicativas.

Na protesta participaron, ademais de múltiples colectivos e plataformas sanitarias, os principais sindicatos de Galicia e os líderes da oposición política, Ana Pontón (BNG) e José Ramón Gómez Besteiro (PSdeG), xunto a outros cargos dos seus partidos. 

 

O portavoz da plataforma SOS Sanidade Pública, Manuel Martín, atendeu aos medios antes do inicio da manifestación para sinalar que esta protesta "ten como obxectivo chamar a atención" da opinión pública e das institucións pola "situación de desmantelamento, de privatización e de bloqueo da sanidade pública".

Pola súa banda, o PP tachou de "partidista" a manifestación.  O portavoz parlamentario do PPdeG, Alberto Pazos, considera que "ten máis que ver co partidista" e "co político" que "co sanitario".

"Hoxe é un día para definir de que lado nos poñemos: se ao lado dos que prefiren o ruído, a pancarta e o alboroto ou ao lado dos que prefiren a xestión, a proposta razoable e a procura de solucións", afirmou Pazos nunha mensaxe remitida aos medios de comunicación.

O representante do PPdeG tamén expresou a súa perplexidade por que se convoque "unha manifestación contra a xestión da Xunta de Galicia" cando hai activas a nivel estatal convocatorias de folga de sindicatos médicos relacionadas coas negociacións co Goberno central polo estatuto marco.