O aviso vermello por calor mantense para este martes no interior de Pontevedra

A alerta vermella por calor manterase activa para este martes no interior da provincia de Pontevedra. Tal e como recolle o Goberno galego nun comunicado, segundo as predicións remitidas por MeteoSalud, e no ámbito do Plan de actuacións da Xunta de Galicia fronte aos posibles efectos das altas temperaturas, para hoxe permanecerán activas alertas por episodio de calor nas seguintes zonas isoclimáticas.

No interior de Pontevedra, nivel 3, é dicir, alerta vermella. No nivel 1, alerta amarela, quedan o noroeste, interior e suroeste da Coruña, montaña de Ourense e as Rías Baixas. As previsións de Meteogalicia indican que as altas presións están localizadas ao norte da Península Ibérica, onde quedarán estacionarias polo menos ata o mércores. Desde esa posición, impedirán que cheguen influencias atlánticas e atraerán aire cálido desde o sur. Isto deixará ceos despexados, vento en calma e temperaturas elevadas nos próximos días.

No que respecta á práctica deportiva, a Xunta, a través da Secretaría Xeral para o Deporte, suspende este martes a actividade do programa Xogade no exterior entre as 12:00 e as 20:00 horas no interior da provincia de Pontevedra. A actividade federada autonómica non se suspende, pero recoméndase non realizala entre as 13:00 e as 17:00, coincidindo coas horas de maior calor, excepto nos deportes náuticos e acuáticos, onde non existe esa recomendación.

Así mesmo, recomendan á organización que adapte os horarios de práctica deportiva ás condicións específicas de cada zona, evitando, se é posible, as horas de maior calor e adoptando as medidas preventivas necesarias para minimizar o impacto das altas temperaturas na saúde.