Domingo de chuvia e vento con aviso amarelo en varios puntos de Galicia
Agárdanse precipitacións persistentes con acumulacións de ata 40 l/m2
Os refachos poderían superar os 80 km/h nos concellos da Mariña
Ondas na praia de Silgar (Sanxenxo). EUROPA PRESS/Elena Fernández
O paso dunha borrasca moi activa deixa este domingo choivas persistentes no suroeste de Galicia. Tamén trae ventos fortes no litoral e nos concellos da Mariña, con refachos de ata 80 quilómetros á hora.
Meteogalicia activa dende as tres da madrugada o aviso amarelo por ventos fortes na costa, e por precipitacións na provincia de Pontevedra e no sur de Ourense, onde se agardan acumulacións por riba dos 40 l/m2 en doce horas.
Ademais, podería chover máis de 15 litros por metro cadrado nunha hora no suroeste da Coruña, polo que tamén nesta zona vai rexer o aviso amarelo.
O paso desta fronte atlántica estenderase ata as 18:00 horas. Despois dunha pequena tregua a primeira hora do luns, a situación complicarase no mar a partir do mediodía, cando se vai activar o aviso laranxa por mar de vento.
