Desmantelan cinco puntos de plantacións de marihuana na comarca do Condado

A Garda Civil investiga varias persoas por delitos contra a saúde pública pola súa presunta vinculación con cinco plantacións de marihuana localizadas na comarca do Condado, nos municipios de Ponteareas, Mondariz e Mondariz-Balneario.

Segundo informaron fontes da Comandancia, as intervencións desenvolvéronse desde finais de agosto. Así, o pasado 31 de agosto, os axentes incautáronse de 11 plantas de marihuana que un home de 51 anos tiña en Mondariz. As investigacións permitiron identificar outras tres persoas e localizar outras catro plantacións: o 11 de setembro, en Angoares, Ponteareas, a Garda Civil atopou nunha vivenda un invernadoiro con cuberta de plástico baixo a que había varias plantas de marihuana de gran tamaño e procedeu a investigar ao dono, un home de 41 anos.

O 14 de setembro en Padróns, tamén en Ponteareas, os axentes localizaron unha plantación composta por 14 plantas de gran dimensión nas inmediacións dun domicilio, e investigaron o seu dono, un home de 73 anos. Ao día seguinte localizaron outra plantación en Ponteareas, en Areas, e investigan por iso un home de 48 anos, que, ao sospeitar das pescudas, xa cortara a maior parte da colleita e só se lle puido intervir unha planta de gran tamaño.

Finalmente, nas últimas horas foi localizada outra plantación na estrada de Vilasobroso, en Mondariz-Balneario, e investígase por iso unha muller de 51 anos. En total, nestas intervencións, en menos dun mes, a Garda Civil incautouse de case 40 plantas de marihuana. As dilixencias instruídas foron postas á disposición da autoridade xudicial.