Investigadas dúas persoas en Arbo tras comisar 19 plantas de marihuana

A Garda Civil de Tui investiga dúas persoas pola súa presunta participación nun suposto delito contra a saúde pública, no municipio pontevedrés de Arbo, tras incautarse de 19 plantas de cánnabis.

Segundo informou o Instituto Armado, os axentes tiveron coñecemento en agosto na leira anexa a unha casa hai diferentes plantas de marihuana. Por mor diso, os axentes realizaron diferentes comprobacións e o día 12 presentáronse no domicilio. Alí localizaron o residente, un home de 24 anos, ao que lle explicaron o caso e manifestaron que as plantas eran da súa propiedade.

O home detallou que as cultivaba para o seu consumo e que desexaba facer entrega voluntaria das mesmas que ten na leira lindeira ao seu domicilio, permitindo a entrada dos axentes actuantes. Unha vez no interior, os axentes procederon a cortar 15 plantas de tamaño grande de entre 150 e 250 centímetros de marihuana, procedendo á súa intervención e posterior traslado a dependencias oficiais do acuartelamento de Arbo.

O propietario foi citado en calidade de investigado non detido, pola súa presunta participación nun suposto delito contra a saúde pública, na súa modalidade de cultivo ou elaboración de droga.

Intervidas catro plantas a unha muller

Por outra banda, os axentes, tamén en Arbo, localizaron catro plantas de marihuana e buscaron a propietaria, unha muller de 22 anos, nacida nas Neves. A moza indicou que dúas das plantas eran da súa propiedade e outras dúas do seu mozo, que as cultivaban para o seu consumo e que queren entregalas voluntariamente.

Os axentes accederon ao interior da leira e cortaron catro plantas de tamaño pequeno, entre 50 e 100 centímetros. Así mesmo, procederon a intervilas e trasladalas a dependencias oficiais do acuartelamento, as cales permanecen nesa unidade ata a súa entrega, para a súa análise en dependencias de sanidade exterior en Vigo.

A moza foi citada en calidade de investigada non detida pola súa presunta participación nun suposto delito contra a saúde pública, na súa modalidade de cultivo ou elaboración de droga. Todas as dilixencias foron entregadas no Tribunal de Ponteareas en funcións de garda.