Veciños da parroquia ourensá de Seixalbo din levar máis dun ano aturando obras ao carón das casas

Os propios veciños de Seixalbo gravaron as últimas consecuencias das obras do AVE: o arrastre de lama e cascallos no regato de Amendo que, a consecuencia das treboadas, acabou inundando as hortas ao seu paso.

Juan Cid, voceiro da asociación de veciños de Seixalbo: "Romperon para cambiar o tubo que estaba obturado e, ao rompelo, marchou a balsa toda por aí abaixo, coas cebolas, chícharos, as hortas...".

Tamén teñen problemas nas vivendas próximas á zona de obras. Tiraron cinco, afectadas polo trazado, e nas que quedaron en pé están vendo fendas que atribúen ás obras.

"Viñeron dous peritos miralas, demos parte e dixeron que se ían poñer en contacto co Adif porque non era unha cousa normal", sinala Rosa, veciña da zona.

Levan máis dun ano aturando as consecuencias das obras, correspondentes á variante exterior do Ave.

"O peor foi cando derrubaron a montaña aquí en fronte, que houbo moito ruído, pero hai que armarse de paciencia un pouco", di outro veciño.

Tamén a estrada, que conduce ao colexio público e ao campo de fútbol, está chea de fochancas pola maquinaria pesada.

Escritos

Xa lles enviaron escritos ao ADIF, á Confederación Hidrográfica e ao Concello de Ourense, para que se asegure de que se reparen os danos cando rematen as obras.