Máis de 1.300 profesionais sanitarios toman posesión como fixos do Sergas
101 dos sanitarios incorpóranse por primeira vez ao Sergas tras superar as oposicións
Un total de 1.311 profesionais sanitarios tomarán posesión este luns como persoal fixo do Servizo Galego de Saúde (Sergas), tras superar os procesos selectivos, tanto en hospitais coma en centros de saúde e entidades coma o 061.
Deles, 996 son persoal facultativo especialista, e 318 son técnicos sanitarios, segundo informa a Xunta.
Do total do persoal que tomará posesión, 700 profesionais continuarán co seu labor no mesmo centro de traballo, mentres que 405 cambiarán de emprazamento.
Ademais, 101 profesionais comezarán a traballar por primeira vez no Sergas a partir de superar estas oposicións. Tamén se adxudicarán as prazas de concurso de traslados destas categorías coincidindo coa incorporación da oferta pública de emprego (OPE), en concreto 85 prazas de distintas especialidades de persoal facultativo especialista e 29 de técnicos especialistas.
A Xunta destaca que desta maneira continúa co proceso de estabilización dos cadros de persoal e mellora dos servizos públicos, con medidas para fomentar a conciliación e a estabilidade dos empregados públicos así como co desenvolvemento da súa carreira profesional.
