Loito en Almería polo asasinato machista dunha muller de 50 anos
Un dos fillos atopou o cadáver este venres
O agresor recoñeceu o crime diante da Garda Civil
A localidade de Tíjola, en Almería, garda loito esta fin de semana polo asasinato machista da súa veciña Maite. O marido confesou o crime e entregouse á Garda Civil a 70 quilómetros do domicilio.
Cinco minutos de silencio e repulsa contra un crime machista que acabou coa vida desta muller de 50 anos, empregada pública e con dous fillos. Un deles atopou o cadáver ao volver ao domicilio familiar este venres pola tarde.
O alcalde de Tíjola, José Juan Martínez, insistiu en que é fundamental a unión contra a violencia machista.
"Este feito desprezable vén demostrar que a violencia de xénero non é un número nin unha estatística. Hoxe a vila de Tíjola viuno desde moi cerca. Se queremos unha democracia real e moderna todas as administracións que estamos aquí debemos traballar de forma conxunta para acabar con esta eiva".
A investigación continúa aberta para determinar como e cando se produciu a agresión, á espera dos resultados da autopsia. No que vai de ano morreron 16 mulleres por violencia machista en España.
