Prisión provisional, comunicada e sen fianza para o matricida de Ponteareas
O detido está investigado por un suposto delito de homicidio
A xuíza da praza 3 da Sección de Instrución do Tribunal de Instancia de Ponteareas, en funcións de garda, decretou este martes o ingreso en prisión provisional, comunicada e sen fianza, do home detido o pasado domingo por presuntamente asasinar a súa nai, de 81 anos.
O detido está investigado por homicidio, segundo fontes do Tribunal Superior de Xustiza de Galicia (TSXG).
Os feitos ocorreron o domingo a primeira hora da tarde, sobre as 14:30, segundo fontes da Garda Civil, cando o detido, un home de 60 anos, matou presuntamente a súa nai con arma branca.
O presunto autor do crime foi detido despois de que confesara o ocorrido estando internado no Hospital Álvaro Cunqueiro de Vigo.
O cadáver presentaba varias feridas provocadas por unha arma branca e a investigación deberá determinar agora as circunstancias exactas en que se produciu a morte, á espera dos resultados da autopsia.
.png)
