Buscan os agresores de dous mozos nas festas de Conxo, en Santiago

Intercambio de golpes ata que sacan de navalla. Un grupo contra un mozo. Sorte que puxo a man diante.

"Foron todos contra el e puxo a man".

"Non é o mesmo grupo. Son dous casos diferentes, que sucederon case á mesma hora pero son dous grupos", confirman a propia vítima e a nai dun dos agredidos.

Sospeitan dunha banda de mozos latinos que xa tiñan ameazada a súa vítima. Un rapaz de 19 anos que, segundo parece, unha noite tivo a mala sorte de coñecer unha das súas.

Por un motivo semellante, por un problema sentimental, por un despeito mal entendido, empezou tamén a outra agresión.

"Eu ía coa miña parella e estaba alí a miña ex e mirábame con cara de rabia, que non sei porque ten esa carraxe. Cando me dei de conta veu unha amiga súa e empezou a insultarme", relata o mozo. 

Increparon elas e axudaron eles. 

"Agarráronme, tiráronme dos pelos, lanzáronme ao chan e abalanzáronse oito ou dez persoas a patearme a cabeza. Eu estaba inconsciente pero, polo que me dixeron, seica ela tamén me pateou a cabeza, que foi a que máis se asañou", engade. 

Non era a primeira arremetida, pero desta vez fóiselles a man. 

"O meu fillo protexeu a cara cos brazos e, de milagre está hoxe aquí porque tantas persoas golpeándolle a cabeza no chan", lamenta a nai. 

Acabou a noite no hospital, con golpes físicos e cos emocionais, máis profundos. 

"Agora estou con tratamento porque non dou durmido. É unha pena", quéixase o mozo, aínda en shock.

Da súa malleira non conseguiron imaxes. Piden axuda, fotos, vídeos, testemuñas.

"Por favor, que non teñan medo porque temos que parar a este grupo de xente. Sabemos quen son, están acostumados a agredir a outras persoas", pide a nai. 

Por sorte, os dous rapaces salvaron desta e xa se recuperan na casa das lesións.