Primeira vítima galega do accidente de Urda: confirman a morte do coruñés desaparecido
O falecido viaxaba no segundo dos vagóns do AVE que colidiu co Iryo
O Instituto de Medicina Legal de Toledo xa realizou 65 autopsias
A Garda Civil de Toledo, Madrid, Sevilla, Logroño e Cidade Real recolleu 72 denuncias de familiares e achegados de desaparecidos, e cinco deles apareceron con vida
O galego falecido viaxaba no AVE (EFE/J.J.Guillen)
A identificación dos cadáveres do accidente ferroviario de Urda avanza, e na tarde deste venres confirmouse que un deles corresponde ao coruñés que figuraba na lista de desaparecidos.
Así o confirmaron á Televisión de Galicia persoas próximas á súa familia, que agardaba noticias en Madrid sobre o seu paradoiro. O falecido viaxaba no segundo dos vagóns do AVE que colidiu co Iryio.
⚫ TOLEDO Confírmase o falecemento do viaxeiro coruñes desaparecido no accidente ferroviario de Urda https://t.co/LnsXP3TM47
— G24 (@G24Noticias) October 30, 2026
O Instituto de Medicina Legal de Toledo xa realizou 65 autopsias
O Instituto de Medicina Legal de Toledo e Cidade Real realizou xa 65 autopsias das persoas falecidas no accidente ferroviario ocorrido en Urda (Toledo), e o balance provisional segue sendo de 69 falecidos, informou o Centro Integrado de Datos (CID), constituído o pasado mércores.
Foron notificadas xa ás familias 12 identificacións, que corresponden a 9 homes e 3 mulleres.
"Ata o momento todas as identificacións das persoas falecidas realizáronse mediante impresión dixital, realizada polo Servizo de Criminalística da Garda Civil", engadiu.
Así mesmo, sinalou que as oficinas das Comandancias da Garda Civil de Toledo, Madrid, Sevilla, Logroño e Cidade Real recolleron 72 denuncias de familiares e achegados de desaparecidos como consecuencia do sinistro.
Do total de denuncias, 38 rexistráronse en Toledo, 24 en Madrid, 8 en Sevilla, unha en Cidade Real e unha en Logroño, mentres que cinco persoas foron localizadas con vida.
Tras esas cinco localizacións, mantéñense activas 67 denuncias por desaparición, das que 14 pertencen a cidadáns estranxeiros da Arxentina, Australia, O Canadá, os Estados Unidos, Francia, O Xapón, México, República Checa, Tunes e Venezuela.
Os labores de autopsia e identificación dos falecidos continúan ininterrompidamente desde o mércores "co maior rigor e celeridade posibles", asegurou o CID.
Nos labores participan máis de 60 profesionais: doce médicos forenses dos Institutos de Medicina Legal e Ciencias Forenses de Toledo, catro de Ciudad Real e dous de Cáceres, así como dúas médicas forenses asesoras do Ministerio de Presidencia, Xustiza e Relacións coas Cortes.
