Detido en Cee por atacar unha muller con gas pementa durante unha pelexa
O home está investigado por un posible delito de violencia de xénero e pesa sobre el unha orde afastamento sobre a vítima
As cámaras de videovixilancia serán clave para aclarar que foi o que pasou realmente nunha terraza de Cee. Unha muller denunciou que se achegou para reclamar unha cazadora que, segundo ela, era súa e que levaba posta outra muller que estaba cun home. A discusión subiu de ton e, segundo a súa versión, o home empurrouna, golpeouna e regoulle a cara cun spray de gas pementa, polo que precisou asistencia médica.
Foi trasladada ao hospital Virxe da Xunqueira, onde quedou en observación polo efecto do gas.
A versión do acusado é ben distinta, mantén que foi a muller a que empezou a agresión é só empregou o gas pementa para defenderse. Sobre el pesa unha orde de afastamento da vítima, imposta polo xulgado de Corcubión, como medida cautelar, á espera de que remate a investigación.
