A Xunta establece sancións de ata 15.000 euros por agresións ao profesorado

A Xunta establecerá sancións de ata 15.000 euros por agresións a profesores e profesoras, que se canalizarán a través dunha nova Oficina de Apoio ao Profesorado en que tamén se analizará se procede denunciar os casos ante a Xustiza.

Segundo o novo marco de convivencia nos centros educativos, ao que deu luz verde o Consello da Xunta e incluirase na lei de acompañamento dos orzamentos para 2027, modifícase a normativa actual para actualizar as condutas consideradas de maior gravidade, entre as que se incluirá as ameazas, vexacións, violencia de xénero ou acoso.

Dentro desta actualización, Galicia "vai ser a primeira comunidade en protexer a autoridade do profesorado, con sancións de ata 15.000 euros no caso de sufrir unha agresión, por parte de familiares de alumnos, os seus responsables legais, ou os propios alumnos", explicou o conselleiro de Presidencia, Xustiza e Deportes, Diego Calvo, na conferencia de prensa posterior á reunión do Goberno galego.

Unha reunión que presidiu en ausencia do titular da Xunta, Alfonso Rueda, que se atopa este martes en Bruxelas para asistir ao Comité das Rexións.

Para canalizar as sancións da nova normativa crearase unha Oficina de Apoio ao Profesorado, na que os docentes tamén recibirán asesoramento xurídico, acompañamento en caso de poñer unha denuncia e apoio psicolóxico, se é preciso.

En todo caso a resposta "adaptarase á gravidade de cada situación", dixo Calvo, xa que se avaliará cada caso para determinar "se hai que promover unha medida de mediación ou denunciar o sucedido ante a Xustiza".

Cando se incorra nalgún dos comportamentos máis graves por parte dos alumnos, a sanción poderá ser a expulsión do centro e, no caso da educación obrigatoria, o cambio forzoso de centro escolar.

Ademais, reforzarase a finalidade educativa das sancións, para o que se fará fincapé en que o alumnado acepte as consecuencias e repare o ano causado; e crearase unha categoría intermedia entre as condutas leves e moi graves.

Por outra banda, o Consello da Xunta aprobou un novo decreto, que entrará en vigor "nos próximos días" coa súa publicación no Diario Oficial de Galicia (DOG), que regulará os servizos que se prestan aos mozos, como campamentos, talleres ou excursións, ao desenvolver o Título II da Lei 6/2012 de mocidade de Galicia.

Entre os cambios máis destacables están, segundo explicou o conselleiro de Cultura e Xuventude, José López Campos, que se amplía o acceso ao exercicio profesional neste ámbito, como monitor ou persoal directivo, xa que non será necesario contar cun título expedido polo sistema galego de escolas de tempo libre, como ata o de agora.

Este tipo de traballo poderá ser realizado polas persoas que conten cun certificado profesional, un título de FP, ou unha titulación educativa que incorpore as cualificacións correspondentes para este tipo de actividades.

Tamén cambiará a regulación dos cocientes para os campamentos e actividades, que deixarán de ser xenerais e establecerse en función do tipo de actividades ou a idade dos participantes. No caso de actividades con declaración responsable con menores de 9 anos, será dunha persoa por cada oito participantes, e para maiores desta idade, dun por cada dez.