Levarse coma o can e o gato xa non é o que era
Estudos recentes demostran que o habitual é que estas mascotas teñan unha boa relación
Levarse coma o can e o gato sempre fixo referencia a unha inimizade entre dúas mascotas que parecían irreconciliables. Pero tanto estudos recentes como as propias familias deste animais desterran o mito
Carme Seoane, veterinaria en Can Cat, asegura que "moitas veces un gato acepta mellor un animal doutra especie ca un gato".
Pero para que un can e un gato cheguen a compartir xogos, colchón e ata comida, teñen que pasar un proceso. Criárense xuntos é un plus, pero a educación tamén xoga. Tamén é importante que o gato teña unha zona alta onde refuxiarse se as cousas se poñen serias.
"Hai moitos factores que implican que un can e un gato se poidan levar ben. Un deles é que se coñezan desde cachorros; outro, a súa introdución na casa, que sexa tranquila, con calma", afirma Carme.
É totalmente factible que un can e un gato se leven ben, e que esa amizade perviva de xeración en xeración. "Coñecemos cans e gatos que conviven perfectamente varias xeracións e nunca tiveron ningún problema, son amigos entre eles e incluso familia", comenta Carme.
Xa saben, igual lle deberiamos cambiar o sentido ao de levarse coma o can e o gato.
