Julio Iglesias, acusado de agresións sexuais por exempregadas do seu servizo doméstico

Exempregadas do servizo doméstico de Julio Iglesias acusaron o cantante de agresións sexuais cando traballaban nas súas mansións do Caribe. Antigas traballadoras -unha empregada de fogar e unha fisioterapeuta- aseguran sufrir tocamentos, insultos e humillacións durante a súa xornada laboral nun ambiente de control e acoso continuo, segundo unha investigación realizada por elDiario.es en colaboración con Univisión Noticias.

Unha destas empregadas sostén mesmo que recibiu presións para manter encontros sexuais co artista, e fala de penetracións, labazadas e vexacións físicas e verbais. Estes feitos, segundo dúas das entrevistadas, ocorreron en 2021 cando a máis nova delas tiña 22 anos.

Así se desprende da investigación realizada durante tres anos nos que contactou con 15 exempregadas do servizo entre as que se inclúe persoal doméstico e outras profesionais especializadas que traballaron para o cantante entre os anos 1990 e 2023 nas propiedades da República Dominicana, das Bahamas e de España.

A empregada que asegurou sufrir penetracións sostén que o artista español, que nese momento tiña 77 anos, mandábaa chamar ao seu cuarto moitas veces ao acabar a xornada laboral. "Usábame case todas as noites", di nunha entrevista con elDiario.es e Univision Noticias.

"Sentíame como un obxecto, como unha escrava", engade. Estes encontros sexuais producíanse case sempre coa presenza e a participación doutra empregada que ostentaba unha superioridade xerárquica respecto a esta traballadora do servizo doméstico.

De acordo con a investigación que publica Diario.es, nas entrevistas, as persoas afectadas falan de "condicións de illamento das mulleres, os conflitos laborais, a estrutura xerárquica do persoal e a tensión ambiental que xeraba o carácter irascible de Iglesias".

As dúas mulleres que refiren agresións sexuais "foron entrevistadas en repetidas ocasións ao longo de máis dun ano, e ofrecen testemuños consistentes e estables", recolle a publicación, que asegura que "as súas declaracións foron contrastadas con abundantes probas documentais, como fotografías, rexistros de chamadas, mensaxes de WhatsApp, visados, informes médicos e outros documentos".

Os feitos descritos por dous das traballadoras tiveron lugar nas residencias de Julio Iglesias en Punta Cana (na República Dominicana) e en Lyford Cay (nas Bahamas) supostamente co coñecemento das mulleres encargadas da xestión do fogar e a contratación do persoal, segundo afirman estas dúas extraballadoras.

Fotografías de corpo enteiro e cara para a contratación

Os testemuños das antigas empregadas describen, sempre segundo a investigación de ElDiario.es e Univisión, un sistema de selección de persoal para o que se lles solicitaba, durante o primeiro intercambio de información, fotografías de fronte e corpo enteiro. Segundo as conversacións de WhatsApp ás que accedeu elDiario.es, pactábase a contratación sen entrevista persoal.

Ao pouco de estar alí, segundo dous dos testemuños, Julio Iglesias sometíaas a preguntas íntimas -"Gústanche as mulleres?", "Gústanche os tríos?", "Operaches os peitos?"- e, nalgúns casos, pedíalles verlles os seos ou tocáballelos, co pretexto de comprobar como lles quedaba a cirurxía de aumento de peito ou para que el avaliase se debían facela. Nese tipo de conversacións tamén lles facía proposicións sexuais, segundo o relato destas mulleres e doutras testemuñas.

Segundo as experiencias de seis extraballadoras ou visitantes da casa coas que falou elDiario.es, aseguran que había dúas categorías de empregadas, as que traballan no servizo doméstico e as que tiñan funcións específicas, como fisioterapeutas ou ben simplemente acompañantes ou invitadas do cantante. Por encima destas, as encargadas, que manexaban todos os asuntos do fogar e transmitían e executaban as ordes do dono da casa. Segundo un dos relatos, estas encargadas instaban ou pedían ás empregadas do servizo doméstico que acudisen á habitación do cantante.