Investigan unha estafa de 112.000 euros con criptomoedas en Ourense
Un xulgado de Ourense investiga a maior estafa de criptomoedas que se coñece na provincia
A vítima comezou investindo unha pequena cantidade, pero foise enredando nunha complexa trama que incluía un bufete de avogados ficticio e ata unha suposta policía cibernética con sede en Suíza
Preto de seis meses é o tempo que se prolongou esta elaborada estafa da que foi vítima un veciño de Ourense. Contactaron con el por Telegram e nun principio só investiu 200 euros, pero a cousa foi crecendo ata chegar aos 112 mil euros.
Luis Garnil, avogado especializado en criptomoedas: "Os datos que a el lle aparecían na aplicación ficticia eran mentira. Só era unha pantalla para que seguira investindo".
Denuncian un delito continuado de estafa que inclúe aplicacións informáticas falsas e ata un despacho de avogados ficticio e unha suposta policía cibernética que lle cobrou á vítima por unha peritaxe inexistente. En todo ese camiño, os ciberdelincuentes foron deixando un rastro do que van tirar os investigadores para tratar de chegar a eles: "Os háckers cometeron un erro, consistente en que enviaron cartos a unha casa de cambio onde hai que facer un perfil real, con DNI ou pasaporte, polo que se pode seguir o rastro", asegura Garnil.
Actualmente, as investigacións están resolvendo a autoría nun vinte por cento dos casos.
Antonio Vázquez, sarxento do Equipo da Garda Civil de Ourense: "Non é imposible. O máis importante é que denuncien. Recompilar todas as evidencias que teñan: chamadas telefónicas, correos electrónicos, conversas..., todo o que teñan, e presentar unha denuncia".
Os equipos da Garda Civil recibiron no último ano 700 denuncias por distintos ciberdelitos, desde criptomoedas a estafas amorosas, entre outros, só na provincia de Ourense con contías que suman os dous millóns de euros.
