Investigan seis persoas por unha estafa de 34.000 euros en Porto do Son
Facíanse pasar por unha entidade financeira para roubar datos persoais e recomendar a instalación dunha aplicación con malware que lles permitía acceder ás contas bancarias da vítima
Empregaban ferramentas tecnolóxicas que modifican o número de orixe que aparece no dispositivo do usuario
A Garda Civil desartellou un grupo criminal formado por 6 integrantes, aos que investiga por unha estafa de 34.000 euros en Porto do Son que se iniciou cunha chamada telefónica a un negocio da localidade.
A investigación iniciouse no mes de xullo de 2024, cando o propietario dun negocio interpuxo unha denuncia por estafa telefónica. Nela comunicaba que recibira unha chamada a través dun número, o cal teoricamente correspondía á entidade bancaria coa que operaba pedíndolle datos persoais e claves das súas contas.
Na chamada, un suposto empregado da entidade indicaba a realización de transferencias non autorizadas desde a súa conta a contas de entidades estranxeiras, utilizando algún tipo de malware instalado no seu terminal móbil, que permitía a acceder á app deste banco. Comunicoulle tamén que recibiría unha segunda chamada na que lle indicarían a forma de proceder para evitalo.
Unha vez recibida a segunda chamada, a vítima facilitoulle as claves bancarias e instalou un software no seu móbil permitindo aos supostos estafadores o acceso remoto ao mesmo, conseguindo o control total das súas contas.
A Garda Civil iniciou unha investigación para constatar a veracidade dos feitos e identificar o autor ou autores no seu caso. Así, comprobaron que o método utilizado para a comisión do delito era unha combinación de vishing e spoofing telefónico, é dicir, suplantación de identidade dunha entidade para acceder a información financeira ou que permita roubar a identidade da vítima.
Este grupo empregaba ademais ferramentas tecnolóxicas que permiten a modificación do número de orixe que aparece no dispositivo do usuario.
Tras a análise minuciosa da información solicitada, os gardas civís lograron a identificación dos supostos integrantes do grupo criminal responsable da estafa en Barcelona, Xaén e Madrid.
As seis persoas implicadas están sendo investigadas por un delito de estafa, outro de branqueo de capitais e un terceiro de pertenza a grupo criminal.
